নিউজ ডেস্ক, 24 এপ্ৰিল : লক ডাউনৰ বাবে পদপথত ঘূৰি ফুৰা জীৱ-জন্তুবোৰেও খাদ্য সংকটত ভুগিছে। হোটেল,অন্যান্য ব্যৱসায়িক প্ৰতিষ্ঠানসমূহ দীৰ্ঘদিনে বন্ধ হৈ পৰাত আৰু বাট-পথত মানুহ নোহোৱা হোৱাত পেলনীয়া খাদ্য বস্তুও পাবলৈ নোহোৱা হৈছে। এই ক্ষেত্ৰত বহু হৃদয়বান লোকে পথৰ জীৱ-জন্তুক খাদ্য খাবলৈ দিছে ৷
পদপথৰ জীৱ-জন্তুক খাদ্যৰ যোগান একাংশৰ শিৱসাগৰৰ ডিমৌৰ ৰঞ্জন বিকাশ মুহুং নামৰ যুৱকজনেও ভোকাতুৰ কুকুৰৰ বাবে অন্নদাতা হৈ পৰিছে । লক ডাউনৰ আৰম্ভণিৰ পৰাই এইজন পশুপ্ৰেমী যুৱকে দৈনিক চাইকেলত খাদ্য লৈ ডিমৌ নগৰত খাদ্যৰ সন্ধানত ঘূৰি ফুৰা কুকৰবোৰক এমুঠি আহাৰৰ যোগান ধৰি আছে । ডিমৌৰ কোঁৱৰ দিহিঙ্গীয়া গাঁৱৰ এজন যুৱকে দৈনিক নিজেই ঘৰতে ভাত ৰান্ধি পথৰ কাষত ভোজপত্ৰত কুকুৰক অন্নদান কৰে। যুৱকজনৰ এই মহানুভৱতাক কৰ্তব্যৰত আৰক্ষী-নিৰাপত্তাৰক্ষী আৰু ডিমৌবাসীয়ে শলাগ লৈছে ।
ইফালে, ধুবুৰীৰ বগৰীবাৰীৰ মহামায়া মন্দিৰত খাদ্যৰ অভাৱত কপিকুলৰ হাহাকাৰ হোৱাত খবৰ পাই গোলকগঞ্জ সমষ্টিৰ বিধায়ক অশ্বিনী ৰায় সৰকাৰে এসপ্তাহৰ বাবে কপিকুলৰ বাবে প্ৰয়োজনীয় খাদ্যৰ যোগান ধৰে ৷ তেওঁ নিজ হাতেৰে কপিকুলক খাদ্য খুৱাই দিয়া কাৰ্যই সকলোৰে দৃষ্টি আকৰ্ষণ কৰিছে ৷
লগতে পঢ়ক : দৰঙত লক ডাউনৰ বাবে পথাৰতে নষ্ট ৰঙালাউ
