শিৱসাগৰৰ ঐতিহাসিক তলাতল ঘৰৰ চৌহদত জিলা প্ৰশাসনৰ উচ্ছেদ অভিযান

ধাৰাবাহিকভাৱে সংবাদ মাধ্যমত বাতৰি পৰিৱেশন হোৱাৰ পাছতে বৃহস্পতিবাৰে শিৱসাগৰৰ ঐতিহাসিক তলাতল ঘৰৰ চৌহদত উচ্ছেদ অভিযানত নামিল জিলা প্ৰশাসন ৷ ব্যৱসায়ী সকলে এই কাৰ্যৰ বিৰোধিতা কৰি প্ৰশাসনক কিছু সময় প্ৰদান কৰিবলৈ অনুৰোধ জনাইছিল যদিও প্ৰশাসনে সেই অনুৰোধ প্ৰত্যাখ্যান কৰে ৷

শিৱসাগৰ,12নৱেম্বৰঃ অৱশেষত শিৱসাগৰৰ ঐতিহাসিক তলাতল ঘৰৰ চৌহদত উচ্ছেদ অভিযানত নামিল জিলা প্ৰশাসন ৷ ধাৰাবাহিকভাৱে সংবাদ মাধ্যমত বাতৰি পৰিৱেশন হোৱাৰ পাছতে বৃহস্পতিবাৰে অবৈধ বেদখলকাৰীৰ দোকান-পোহাৰ উচ্ছেদ কৰে প্ৰশাসনে ৷ উল্লেখ্য যে, দীৰ্ঘদিন ধৰি তলাতল ঘৰৰ চৌহদৰ মাটিত দোকান দি ব্যৱসায় কৰি আহিছিল একাংশ লোকে ৷ যাৰ পৰিপ্ৰেক্ষিতত বৃহস্পতিবাৰে জিলা উপায়ুক্ত,দণ্ডাধীশৰ উপস্থিতিত আৰক্ষীৰ এটা বিশাল বাহিনী নামি পৰে উচ্ছেদ অভিযানত ৷

ইপিনে,ব্যৱসায়ী সকলে এই কাৰ্যৰ বিৰোধিতা কৰি প্ৰশাসনক কিছু সময় প্ৰদান কৰিবলৈ অনুৰোধ জনাইছিল যদিও প্ৰশাসনে সেই অনুৰোধ প্ৰত্যাখ্যান কৰে ৷ আনহাতে প্ৰশাসনে দোকান-পোহাৰ উচ্ছেদ কৰাৰ বিপৰীতে একাংশ লোকে অবৈধভাৱে নিৰ্মাণ কৰা গৃহসমূহ উচ্ছেদ কৰাৰ পৰা বিৰত থাকে ৷ ইয়াকে লৈ সৰৱ হৈ পৰে সচেতন মহল ৷ পৰিস্থিতি উত্তপ্ত হৈ পৰাত অৱশেষত সকলো দিশ বিবেচনা কৰি জিলা প্ৰশাসনে তলাতল ঘৰৰ সমুখৰ দোকান সমূহ উচ্ছেদ কৰিবলৈ বাধ্য হয় ৷

লগতে পঢ়কঃ উজনি আৰু উত্তৰ অসমৰ ৪৯ টা সমষ্টিলৈ বিজেপিৰ চকু কিয় ?