আমগুৰি , ২০ জুলাইঃ বানৰ পাছত শিৱসাগৰ জিলাৰ দিখৌমুখত ভয়াৱহ ৰূপ ধাৰণ কৰিছে গৰাখহনীয়া সমস্যাই ৷ বানে তচনচ কৰি যোৱা দিখৌমুখৰ মামল চিকাৰী পাৰাঘাটকে ধৰি ১০ খনৰো অধিক গাঁৱত ভয়ংকৰ ৰূপ ধাৰণ কৰিছে ব্ৰক্ষ্মপুত্ৰৰ গৰাখহনীয়াই ৷ বহু পৰিয়ালৰ মাটি-ভেঁটি উচন হোৱাৰ লগতে খেতি-পথাৰ নদীত বিলীন হৈছে দিখৌমুখৰ ১ নং আলিমূৰ, ২ নং আলিমূৰ, বৰগাঁও, জনমিৰি মিছিং গাঁও, পুৰণিগুডাম, ৰূপহীমুখ মিছিং গাঁও, কুমাৰ গাঁও আদি অঞ্চলত ৷
স্থানীয় ৰাইজৰ ক্ষোভ , গুৰুত্ব নাই জলসম্পদ বিভাগ আৰু স্থানীয় বিধায়কৰ । ৰাজ্যৰ জলসম্পদ বিভাগৰ চূড়ান্ত অৰ্কমণ্যতা আৰু আমগুৰি সমষ্টিৰ বিধায়ক প্ৰদীপ হাজৰিকাৰ গুৰুত্বহীনতাৰ ফল ভোগ কৰিছে দিখৌমুখ আৰু ৰূপহীমুখবাসীয়ে ৷ উল্লেখ্য যে , বিধায়ক প্ৰদীপ হাজৰিকাই খহনীয়া ৰোধৰ কাৰণে ১৭০ কোটি টকীয়া পাইলট প্ৰজেক্ট ঘোষণা কৰিছিল যদিও বৰ্তমান পৰ্যন্ত আৰম্ভ হোৱা নাই প্ৰকল্পৰ কাম ৷ বিধানসভা নিৰ্বাচনৰ পূৰ্বে সমষ্টিবাসীক আভূৱা ভাৰিছে বুলিও অভিযোগ উত্থাপন কৰিছে আমগুৰিবাসীয়ে ৷ শীঘ্ৰে সমস্যাৰ স্থায়ী সমাধানৰ দাবী ভুক্তভোগীৰ ৷
লগতে পঢ়কঃঅখিল গগৈৰ মুক্তিৰ দাবীত বৰপেটা মেধিৰটাৰীত শতাধিক লোকৰ প্ৰতিবাদ
