শিৱসাগৰ, 9 জুলাই :শিৱসাগৰৰ ঐতিহাসিক শিৱ দ'লত আশ্চৰ্যকৰ ঘটনা ৷ এজোপা এজোপাকৈ শিৱ দ'ল প্ৰাংগণৰ প্ৰায় সকলোবোৰ ডাঙৰ গছ কাটি পেলাইছে শিৱ দ'ল উন্নয়ণ সমিতিয়ে । কাৰ অনুমতিত কিহৰ বাবে কটা হৈছে এই গছবোৰ ?
শিৱসাগৰৰ নগৰত থকা ঐতিহাসিক শিৱ দ'ল, বিষ্ণু দ'ল আৰু দেৱী দ'ল প্ৰাংগণ শুৱনি কৰাৰ লগতে দৰ্শনাৰ্থীক বিশেষভাৱে আকৰ্ষণ কৰি আহিছে এই গছবোৰে ৷ প্ৰকৃতি ৰক্ষাৰ লগতে দ'ল চৌহদ শুৱনি কৰি ৰখা এই গছৰবোৰৰ প্ৰয়োজনীয়তা ন'কলেও সকলোৰে জ্ঞাত । কিন্তু হঠাৎ উন্নয়ন সমিতিয়ে দুদিনৰ পৰা কাটিবলৈ আৰম্ভ কৰিছে শিৱ দলৰ প্ৰাংগণত থকা গছবোৰ ।
ইতিহাস কঢ়িয়াই লৈ থকা এই দ'ল কেইটা বৰ্তমান কেন্দ্ৰীয় পূৰাতত্ব বিভাগৰ তত্বাৱধানত আছে । হৰটিকালচাৰ শাখাই দ'লৰ প্ৰাংগণত কি কি উদ্ভিদ ৰুব অথবা কি কি উদ্ভিদ কাটিব তাৰ বিজ্ঞান সন্মত সিদ্ধান্ত গ্ৰহণ কৰে । কিন্তু আশ্চৰ্যজনক ভাৱে এই বিভাগৰ লগত আলোচনা নকৰাকৈ দ'ল প্ৰাংগণৰ সকলো গছ কাটি দিবলৈ নিৰ্দেশ দিয়ে দ'ল উন্নয়ণ সমিতিয়ে ৷
শিৱসাগৰৰ শিৱ দ'লৰ গছ কাটি তহিলং দ'ল উন্নয়ণ সমিতিৰ এই সন্দৰ্ভত কেন্দ্ৰীয় পূৰাতত্ব বিভাগ(Central Department of Archaeology)ৰ হৰটিকালচাৰৰ শাখাৰ বিষয়া নিখিল দাসে বিভাগৰ তৰফৰ পৰা কোনো অনুমতি নোলোৱা বুলি অৱগত কৰে । সেইদৰে পৰিৱেশ সুৰক্ষা স্বাৰ্থত গছ কাটিবৰ বাবে বন বিভাগৰ পৰা অনুমতি গ্ৰহণ কৰা বাধ্যতামূলক । কিন্তু দ'ল উন্নয়ণ সমিতিয়ে দ'ল চৌহদৰ গছ কাটিবৰ বাবে বন বিভাগৰ পৰাও কোনো অনুমতি গ্ৰহণ কৰা নাই বুলি বন বিভাগে অৱগত কৰিছে ।
এনে স্থলত স্বয়ং শিৱসাগৰ জিলা উপায়ুক্ত দ'ল উন্নয়ণ সমিতিৰ সভাপতিৰ পদত অধিষ্ঠিত থকাৰ সময়ত কিয় এনেদৰে অবৈধ ভাৱে দ'লৰ প্ৰাংগণৰ গছ কাটিব লগা হ'ল সেইয়া এতিয়া এটা ডাঙৰ প্ৰশ্ন ৷ উন্নয়ণ সমিতিৰ সম্পাদক বসন্ত গগৈৰ মতে গছবোৰৰ শিপাই ভিতৰি ভিতৰি দ'ল কেইটাৰ আন্তঃগাঁঠনিৰ ক্ষতি কৰিছে । লগতে একাংশ গছৰ বাবে দ'ল কেইটাত ৰ'দ নপৰাৰ বাবে দ'লৰ মূল ভৱনৰ ক্ষতি হৈছে । এনেবোৰ কাৰণতে দ'লৰ প্ৰাংগণত থকা গছ সমূহ কাটিবলৈ সিদ্ধান্ত লোৱা হ'ল বুলি সম্পাদকজনে যুক্তি আগবঢ়াইছে ।
লগতে পঢ়ক: গৃহ বিভাগত হাহাকাৰ : কেনেকৈ জামিন পালে পলাতক মফিদুলে ?
