শিৱসাগৰত চলন্ত বাহনৰ পৰা ডকাইতে লুটি নিলে টকা

দিন দুপৰত বহু লোকৰ সন্মুখত ডকাইতে আলিমুদ্দিন আহমেদৰ পৰা ধন কাঢ়ি পলায়ন কৰিবলৈ সক্ষম হয় ৷ বুধবাৰে পুৱা শিৱসাগৰ নগৰৰ কানাড়া বেংকৰ শাখাৰ পৰা আহমেদে প্ৰতিষ্ঠানৰ দুই লাখ টকা উলিয়াই অনিছিল। শিৱসাগৰ নগৰত এনে ঘটনা দৈনিক সংঘটিত হ'বলৈ ধৰিছে ।

শিৱসাগৰ, 27 নৱেম্বৰঃশিৱসাগৰ নগৰৰ মাজমজিয়াত পুনৰ দিন ডকাইতিৰ ঘটনা পোহৰলৈ আহিছে ৷ পূৰ্বতে অনেকবাৰ অনুৰূপ ঘটনা সংঘটিত হৈ যোৱাৰ দৰে বুধবাৰে নগৰ খনৰ পৰিবহন নিগম তিনি আলিৰ সমীপৰ পৰা ডকাইতে চলন্ত দুচকীয়া বাহনৰ পৰা লুটি নিলে দুই লাখ টকা। নগৰৰ ষ্টেচন চাৰি আলিৰ শৈলেশ বাঞ্চালৰ মালিকাধীন এছিয়াটিক ট্ৰেভেলছৰ কৰ্মচাৰী আলিমুদ্দিন আহমেদৰ পৰা ডকাইতে লুটিলে এই ধন ।

জানিব পৰা মতে বুধবাৰে পুৱা শিৱসাগৰ নগৰৰ কানাড়া বেংকৰ শাখাৰ পৰা আহমেদে প্ৰতিষ্ঠানৰ দুই লাখ টকা উলিয়াই অনিছিল। ধন ভৰোৱা বেগটো তেওঁ ডিঙিত ওলোমাই এখন স্কুটিৰে প্ৰতিষ্ঠানলৈ আহি থকা অৱস্থাত এখন নীলা 220 পালচাৰ বাইকত অহা দুজন যুৱকে চলন্ত অৱস্থাত তেওঁৰ ধনৰ বেগ কাঢ়ি উধাও হয় । ঘটনা ইমান আকস্মিক আৰু ভয়াৱহ আছিল যে আহমেদে ডিঙিত ওলোমাই নিয়া বেগৰ ৰচী চিঙি যোৱাৰ লগতে আহমেদ পথৰ ওপৰত পৰি আঘাত প্ৰাপ্ত হয়। দিন দুপৰত বহু লোকৰ সন্মুখত এইদৰে ডকাইতে ধন খিনি কাঢ়ি লৈ এ.টি.ৰোড হৈ কে.পি.চাৰিআলিৰ দিশে পলায়ন কৰে।

উল্লেখ্য যে শিৱসাগৰ নগৰত এনে ঘটনা দৈনিক সংঘটিত হ'বলৈ ধৰিছে । কিন্তু শিৱসাগৰ আৰক্ষীয়ে আজিলৈ এনে অপৰাধীক কৰায়ত্ব কৰিবলৈ সক্ষম হোৱা নাই। শিৱসাগৰ নগৰৰ বিভিন্ন বেংকত চোপ লোৱা এই চক্ৰই বেংকৰ ভিতৰৰ পৰা মোটা অংকৰ ধন উঠাবলৈ অহা লোকৰ পিছ লৈ এইদৰে ধন কাঢ়ি নিয়ে। বিভিন্ন সময়ত এনে সন্দহজনক লোকৰ চিচি টিভি ফুটেজ লাভ কৰাৰ পাচতো কিন্তু আৰক্ষীয়ে আজিকোপতি কোনো পদক্ষেপ গ্ৰহণ কৰা দেখা নগ'ল। বুধবাৰে সংঘটিত হোৱা এনে ডকাইতি কেৱল উদ্বেগজনক নহয়,বৰঞ্চ ভয়াৱহ। কিয়নো চলন্ত বাহনৰ পৰা পৰি যোৱা আলিমুদ্দিন আহমেদৰ কোনোমতেহে প্ৰাণ ৰক্ষা পৰে । এতিয়াও যদি শিৱসাগৰ আৰক্ষী সাৰ নাপাই তেন্তে অৰাজক হ'ব শিৱসাগৰ ৷

লগতে পঢ়ক- যোৰহাটৰ পৰা আটক দুই দুধৰ্ষ আলফা কেডাৰ