ৰম্যভূমি দিচাংমুখত চপৰা চপৰে খহিছে ব্ৰহ্মপুত্ৰৰ গৰা

দিচাংমুখৰ গৰাখহনীয়া এক দীৰ্ঘদিনীয়া সমস্যা ৷ ১৯৯৮ চনৰ পৰা অব্যাহত থকা এই সমস্যাৰ সমাধান বিচাৰি হতাশ হৈ পৰিছে জনসাধাৰণ। বিগত কিছু বছৰত গৰাখহনীয়া হোৱা নাছিল যদিও এইবাৰ ৰম্যভূমি দিচাংমুখত তীব্ৰ ৰূপ ধাৰণ কৰিছে সমস্যাটোৱে। বিগত প্ৰায় দুটা মাহৰ ভিতৰত ব্ৰহ্মপুত্ৰৰ প্ৰৱল খহনীয়াই এই অঞ্চলৰ বহু কিলোমিটাৰ উতুৱাই নিয়া বুলি গাওঁবাসীয়ে জানিবলৈ দিয়ে।

শিৱসাগৰ, 16 অক্টোবৰ: প্ৰৱল গৰাখহনীয়াৰ কৱলত পৰিছে শিৱসাগৰৰ দিচাংমুখবাসী ৷ প্ৰকৃতিৰ ৰম্যভূমি দিচাংমুখত কাল ৰূপ ধাৰণ কৰা ব্ৰহ্মপুত্ৰৰ খহনীয়াৰ বাবে বিনিদ্ৰ ৰজনী যাপন কৰিছে অঞ্চলটোৰ জনসাধাৰণে ৷ দিচাংমুখৰ অফলা, মামল গড়ভগা, চৰাইপাৰা আদি গাঁও সমূহৰ বহু ঘৰ দুৱাৰ, কৃষিভূমি এতিয়া ব্ৰহ্মপুত্ৰৰ বুকুত ৷

দিচাংমুখৰ গৰাখহনীয়া এক দীৰ্ঘদিনীয়া সমস্যা ৷ ১৯৯৮ চনৰ পৰা অব্যাহত থকা এই সমস্যাৰ সমাধান বিচাৰি হতাশ হৈ পৰিছে জনসাধাৰণ। বিগত প্ৰায় দুটা মাহৰ ভিতৰত ব্ৰহ্মপুত্ৰৰ প্ৰৱল খহনীয়াই অঞ্চলটোৰ বহু অঞ্চল উটুৱাই নিয়ে ৷

পৰিস্থিতি ইমানেই ভয়াৱহ হৈ পৰিছে যে খহনীয়াৰ পৰা সকাহ পাবলৈ বাৰীৰ গছ কাটি , ঘৰ ভাঙি নিৰাপদ দূৰত্বত অৱস্থান কৰিছে ৰাইজে । ইতিমধ্যে জলসম্পদ মন্ত্ৰী কেশৱ মহন্ত, যোৰহাটৰ সাংসদ তপন কুমাৰ গগৈয়ে এমাহৰ আগত গৰাখহনীয়া পৰিদৰ্শন কৰি ৰাইজক সমস্যা সমাধানৰ প্ৰতিশ্ৰুতি দিছিল যদিও সকলো ফুটুকাৰ ফেনলৈ পৰিণত হৈছে। এনেদৰে এতিয়া জীৱন-মৰণৰ সংকটৰ মাজত দিনপাৰ কৰিবলগীয়া হৈছে দিচাংমুখবাসীয়ে ৷