AJP ৰ সৈতে অংকিতা দত্তৰ বৈঠক শিৱসাগৰ , 3 অক্টোবৰ : ‘‘ৰাজনীতিত একো অসম্ভৱ নহয় ৷ মই ৰাইজৰ সৈতে কাম কৰি গৈছো আৰু কাম কৰি যাম ৷ অসম জাতীয় পৰিষদৰ এক অসম যাত্ৰাক মই সমৰ্থন জনাইছো ৷ আজি লুৰীণজ্যোতি গগৈ শিৱসাগৰলৈ আহিছে ৷ কি পালে কি নাপালে- সেই সন্দৰ্ভত মই জানিবলৈ আহিলো ৷’’ সোমবাৰে সংবাদ মাধ্যমৰ আগত এই মন্তব্য কৰে অংকিতা দত্তই ৷
উল্লেখ্য যে, সোমবাৰে শিৱসাগৰৰ হোটেল হলিডে প্লেচ (Holiday Place) ত অসম জাতীয় পৰিষদৰ সভাপতি লুৰীণজ্যোতি গগৈ, উপ সভাপতি দুলু আহমেদ আৰু অসম প্ৰদেশ যুৱ কংগ্ৰেছৰ নিলম্বিত সভানেত্ৰী অংকিতা দত্তই এক গুৰুত্বপূৰ্ণ বৈঠকত মিলিত হয় । এই বৈঠকত অংশগ্ৰহণ কৰি সংবাদ মাধ্যমৰ আগত লুৰীণজ্যোতি গগৈ আৰু অংকিতা দত্তই কেতবোৰ মন্তব্য প্ৰদান কৰে । লগতে এই বৈঠকত মূল্যবৃদ্ধি সন্দৰ্ভতো আলোচনা কৰা হয় ৷
অসমৰ মানুহৰ বাবে হিয়া উজাৰি কাম কৰিব পাৰে অংকিতাই : লুৰীণজ্যোতি গগৈ ইফালে সংবাদ মাধ্যমৰ আগত অসম জাতীয় পৰিষদৰ সভাপতি লুৰীণজ্যোতি গগৈয়ে কয়, ‘‘অসমক ভালপোৱা, জাতীয়তাবোধ সম্পন্ন প্ৰতিগৰাকী মানুহক অসম যাত্ৰাত আমি বিচাৰো ৷ এই যাত্ৰা অসমৰ মানুহৰ বাবে, এই যাত্ৰা অসমৰ মানুহৰ স্বাভিমান প্ৰতিষ্ঠাৰ কাৰণে ৷ সেয়ে শক্তিশালী জাতিয়তাবোধ থকা প্ৰতিগৰাকী অসমৰ মানুহক অসম জাতীয় পৰিষদৰ পতাকাৰ তলত থিয় হোৱাটো বিচাৰো’’ ৷
গগৈয়ে আৰু কয়, ‘‘এই যাত্ৰাত আমাৰ দলৰ দৰ্শন, আদৰ্শ, চিন্তা-চেতনাৰ লগত অসম আৰু অসমীয়া মানুহৰ ভৱিষ্যত ভাষা, কৃষ্টি, সংস্কৃতি, ৰাজনৈতিক অধিকাৰ সকলো নিৰ্ভৰ কৰিব ৷ গতিকে মই অসমৰ প্ৰতিগৰাকী মেধাসম্পন্ন যুৱক-যুৱতী, নেতা, প্ৰতিশ্ৰুতিসম্পন্ন প্ৰতিগৰাকী ব্যক্তিকে অসমৰ কাৰণে জাতীয়তাবাদৰ পতাকাৰ তলত থিয় হোৱাটো বিচাৰিম’’ ৷
আনহাতে, অংকিতা দত্তৰ সন্দৰ্ভত অসম জাতীয় পৰিষদৰ সভাপতি লুৰীণজ্যোতি গগৈয়ে কয়, ‘‘অসমক সকলোৱে ভাল পায় ৷ অংকিতা দত্তয়েও অসমক ভাল পায় । অসমৰ মানুহৰ বাবে হিয়া উজাৰি কাম কৰিব পাৰে অংকিতাই ৷ আমাৰ যাত্ৰাৰ বাৰ্তাটো নিঃসন্দেহে শক্তিশালী ৷ সেয়ে এই যাত্ৰালৈ অহাটো স্বাভাৱিক ৷ কেৱল অংকিতাই নহয়, আৰু মানুহ আহিব’’ ৷
উল্লেখ্য যে শিৱসাগৰত অসম জাতীয় পৰিষদৰ নেতৃবৰ্গৰ সৈতে অসম প্ৰদেশ যুৱ কংগ্ৰেছৰ নিলম্বিত সভানেত্ৰী অংকিতা দত্তৰ এক বৈঠকক লৈ এতিয়া ৰাজ্যৰ ৰাজনীতিত আৰম্ভ হৈছে নতুন চৰ্চা ৷ যদিও বৈঠকত অংকিতা দত্তৰ ৰাজনৈতিক ভৱিষ্যৎ সম্পৰ্কে আলোচনা হৈছে নে নাই তাক লৈ মন্তব্য নকৰি প্ৰসংগটো এৰাই চলাই চলে দুয়োপক্ষই ৷ কিন্তু এই বৈঠকখনে নিশ্চয়কৈ জন্ম দিছে বহু ৰাজনৈতিক জল্পনা-কল্পনাৰ ৷
লগতে পঢ়ক :Nagaon Shahid Bhavan : গান্ধী জয়ন্তীৰ দিনাই পুনৰ উদ্বোধন হ’ল নগাঁও শ্বহীদ ভৱন
