আমগুৰি,১৪ ফেব্ৰুৱাৰী: শিৱসাগৰ জিলাৰ আমগুৰিত বৃহস্পতিবাৰে ছাত্ৰ মুক্তি সংগ্ৰাম সমিতি আৰু নাৰী মুক্তি সংগ্ৰাম সমিতিৰ উদ্যোগত সাত শতাধিক মহিলাই নাগৰিকত্ব সংশোধনী আইন বিৰোধিতা লগতে ক্ষুদ্ৰ বিত্তীয় প্ৰতিষ্ঠানৰ লুণ্ঠন বন্ধৰ দাবী আৰু অখিল গগৈৰ লগতে সকলো কা বিৰোধী কাৰাবন্দীৰ মুক্তিৰ দাবীত এক বিশাল প্ৰতিবাদী কাৰ্যসূচী গ্ৰহণ কৰে । প্ৰতিবাদকাৰীসকলে আমগুৰিৰ দেওবৰীয়া বজাৰ গৃহৰ পৰা আমগুৰি নগৰৰ মাজেৰে প্ৰতিবাদী ৰেলি কৰি আমগুৰি ৰাজহ চক্ৰ কাৰ্যলয় ঘেৰাও কৰে । প্ৰতিবাদকাৰী সকলে নাগৰিকত্ব সংশোধনী আইন বাতিল কৰক,কা আমি নামানো, অখিল গগৈক মুক্তি দিয়ক, ধৈৰ্য কোঁৱৰক মুক্তি দিয়ক, বিতু সোণোৱালক মুক্তি দিয়ক, মানস কোঁৱৰক মুক্তি দিয়ক, সকলো কা বিৰোধী কাৰাবন্দীক মুক্তি দিয়ক, আমাক নিয়া নালাগে, আমাক ন্যায় লাগে, গণতন্ত্ৰ ৰক্ষা কৰক, মাইক্ৰ'ফাইনেন্সৰ লুণ্ঠন বন্ধ কৰক, মেনেজাৰ আৰু কালেক্টৰে ঘৰে ঘৰে গৈ মানসিক নিৰ্যাতন আৰু ভয় ভাবুকি দিয়া বন্ধ কৰক, ৰিজাৰ্ভ বেংকৰ নীতি নিয়ম মানি চলক আদি শ্ল'গানেৰে প্ৰতিবাদী ৰেলী কৰি উত্তাল পৰিবেশৰ সৃষ্টি কৰে ।
লগতে পঢ়ক:ভাৰতৰ শীৰ্ষ উদ্যোগপতিৰে মিলিত হ'ব ট্ৰাম্প
চক্ৰবিষয়া কাৰ্যালয়ৰ সন্মুখত প্ৰতিবাদী সভাত ছাত্ৰ মুক্তিৰ কেন্দ্ৰীয় সাংগঠনিক সম্পাদক ঋতুমণি হাজৰিকাই কয় যে, বি জে পি চৰকাৰে ষড়যন্ত্ৰ মূলক ভাবে কা বিৰোধী আন্দোলন কৰা বাবে কৃষক মুক্তিৰ উপদেষ্টা অখিল গগৈসহ কৃষক মুক্তি, ছাত্ৰ মুক্তিৰ বিষয়ববীয়া সকলক বন্দী কৰি ৰাখিছে । আৰু চৰকাৰৰ দ্বাৰা নিয়ন্ত্ৰিত নিয়াই কৃষক নেতা জনৰ লগতে সকলো কাৰাবন্দীক যি মাওবাদী সজাবলৈ উঠি পৰি লাগিছে সেই বিষয়টোক তীব্ৰ ধিক্কাৰ দিয়ে । অখিল গগৈ লগতে সকলো কাৰাবন্দীৰ মুক্তিৰ দাবী জনায় । লগতে ২০২১ চনত বি জে পিক অসমীয়া ৰাইজে উৎখাট কৰিব বুলি জনায় । ক্ষুদ্ৰ বিত্তীয় প্ৰতিষ্ঠান সমূহে যেতিয়ালৈকে সংগঠনটোৰ দাবী সমূহ মানি নলব তেতিয়ালৈকে কিস্তি প্ৰদান নকৰে বুলি কোৱাৰ লগতে কাইলৈ পৰা গাঁও অঞ্চলত বা মহিলা সকলৰ ঘৰত কিস্তি বিচাৰি জোৰ জুলুম, মানসিক নিৰ্যাতন, ভয় ভাবুকি খুৱাই তেতিয়া ৰাইজ আৰু মহিলা সকলে ধৰি বান্ধি প্ৰশাসনক গতাই দিয়াৰ সিদ্ধান্ত গ্ৰহণ কৰে ।