শিৱসাগৰ, 20 জুন : ৰাজ্যজুৰি অব্যাহত আছে জল প্ৰলয় (Assam flood 2022) ৷ বিগত প্ৰায় পোন্ধৰ দিন ধৰি ৰাজ্যখনত হোৱা নেৰানেপেৰা বৰষুণৰ ফলত ব্ৰহ্মপুত্ৰ নদীৰ লগতে ইয়াৰ উপনৈ সমূহৰ জলপৃষ্ঠ বৃদ্ধি পোৱাত সমগ্ৰ ৰাজ্যৰ লগতে শিৱসাগৰ জিলাখনৰো বিভিন্ন অঞ্চল বানত প্লাবিত হৈছে ৷ বানৰ প্ৰকোপত ইতিমধ্যে গৃহহাৰা হৈ আশ্ৰয় শিবিৰলৈ ঢাপলি মেলিছে 10 খনকৈ গাঁৱৰ লোকে ৷ পোহনীয়া জীৱ-জন্তুৰ লগতে বানাক্ৰান্ত লোকসকলে একেলগে মথাউৰিত থাকিবলগীয়া অৱস্থাৰ সৃষ্টি হৈছে ৷
সোমবাৰে পুৱা শিৱসাগৰ জিলাৰ ১০৮ নং শিৱসাগৰ বিধানসভা সমষ্টিৰ দিচাংমুখ গাঁও পঞ্চায়তত উপস্থিত হৈ বানাক্ৰান্ত লোকসকলৰ সমস্যাৰ বুজ লয় সমষ্টিটোৰ বিধায়ক তথা ৰাইজৰ দলৰ সভাপতি অখিল গগৈয়ে (Akhil Gogoi in Sivasagar ) ৷
সংবাদ মাধ্যমৰআগত সভাপতি গৰাকীয়ে উল্লেখ কৰে যে সম্প্ৰতি বিধানসভা সমষ্টিটোৰ অন্তৰ্গত ১০ খন গাঁৱত খাদ্য যোগান ধৰিব লগীয়া হৈছে (Flood relief in Sivasagar) । ইতিমধ্যে বানত আক্ৰান্ত হোৱা এই গাঁওসমূহলৈ প্ৰশাসনৰ তৰফৰ পৰা খাদ্য যোগান ধৰিবৰ বাবে শিৱসাগৰ জিলা উপায়ুক্তৰ লগতে চক্ৰ বিষয়াক নিৰ্দেশ দিছে বিধায়কগৰাকীয়ে ৷