শিৱসাগৰ, 17 ডিচেম্বৰ : শিৱসাগৰৰ দিচাংমুখৰ অফলাত বান গৰাখহনীয়াই বিধ্বস্ত কৰা ৰাইজৰ দীৰ্ঘদিনীয়া সমস্যাৰ স্থায়ী অৱসান ঘটাই যুগ সাপেক্ষ আৰু বাস্তৱ সন্মত পৰিকল্পনাৰ দাবীৰে দিচাংমুখৰ গড়ভগাত প্ৰতিবাদী মানৱ শৃংখল কৰ্মসূচী ৰূপায়ন কৰিলে আছুৱে(AASU's protest in Sivsagar) । প্ৰতি বছৰে বান বিধ্বস্ত অঞ্চলটোলৈ অসম চৰকাৰৰ বিভাগীয় মন্ত্ৰীয়ে গৈ অঞ্চলটোৰ বুজ লয় আৰু প্ৰতিশ্ৰুতি দি যায় । অসমৰ মুখ্যমন্ত্ৰী তথা জল সম্পদ মন্ত্ৰী(Water resource minister Assam) উক্ত স্থানত উপস্থিত হৈ পৰিস্থিতিৰ বুজ লৈছিল যদিও কোনো ধৰণৰ সঠিক সমাধানত উপনীত হোৱা নাই বান বিধ্বস্ত অঞ্চলটো ।
খৰালি কুম্ভকৰ্ণৰ নিদ্ৰাত নিমগ্ন হৈ জল সম্পদ বিভাগটোৱে বাৰিষা সাৰ পাই মাথো দুখনমান টিৰ্পাল আৰু বাঁহৰ পাৰ্কোপাইন যোগান ধৰি নিজৰ দায়িত্ব সামৰণি মৰাৰ অভিযোগেৰে শুকুৰবাৰে মানৱ শৃংখলৰ জৰিয়তে চৰকাৰক সকীয়াই দিছে আছু তথা স্থানীয় ৰাইজে । প্ৰতিবাদকাৰী সকলে প্ৰশ্ন কৰে যে কথাৰ ফুলজাৰি মাৰি বাৰিষা মেচিন নাৱত উঠি অসম চৰকাৰৰ জল সম্পদ দপ্তৰৰ মন্ত্ৰীয়ে কি বুজিব দিচাংমুখবাসীৰ সমস্যা ।