শিৱসাগৰ, 15 ছেপ্তেম্বৰ : ডিব্ৰুগড় চহৰৰ থানা চাৰিআলিস্থিত ভাৰতীয় ষ্টেট বেংকত মহিলাক অসৎ ব্যৱহাৰৰ দৰে লজ্জাজনক কাণ্ড সংঘটিত কৰা ঘটনাৰ অভিযুক্ত ৰিতুৰাজ শেনচোৱাক বুধবাৰে নিশা শিৱসাগৰ আৰক্ষীয়ে গ্ৰেপ্তাৰ কৰে । উল্লেখযোগ্য যে, ১৪ ছেপ্তেম্বৰত ডিব্ৰুগড়ৰ ষ্টেট বেংকত এই লজ্জাজনক কাণ্ড সংঘটিত কৰিছিল লম্পটটোৱে ।
এগৰাকী মহিলাক কাউন্টাৰত ধনৰ লেনদেনৰ বাবে শাৰীপাতি থকাৰ অৱস্থাত অসৎ ব্যৱহাৰ কৰাৰ অপৰাধত শিৱসাগৰ আৰক্ষীয়ে কৰায়ত্ব কৰে ৰিতুৰাজ শেনচোৱা নামৰ লোকজনক । ঘটনা সন্দৰ্ভত ইতিমধ্যে ডিব্ৰুগড় আৰক্ষী থানাত এক গোচৰ ৰুজু কৰা হৈছিল । শিৱসাগৰ ৰাজ্যিক পৰিবহন বাছ আস্থানৰ পৰা কৰায়ত্ব কৰে ৰিতুৰাজ শেনচোৱাক ।
শিৱসাগৰ সদৰ থানাৰ নগৰ উপ-পৰিদৰ্শক জ্যোতিষ ফুকনৰ নেতৃত্বত আৰক্ষীৰ দলে শিৱসাগৰ বাছ আস্থানৰ পৰা কোনো স্থানলৈ পলায়নৰ যো-জা কৰোতেই কৰায়ত্ব কৰে ৰিতুৰাজক । উল্লেখযোগ্য যে, মঙলবাৰে কু-চৰিত্ৰৰ ৰিতুৰাজে মহিলাগৰাকীৰ অজ্ঞাতেই বেংকতে অসৎ কাৰ্য চৰিতাৰ্থ কৰাৰ বাবে চেষ্টা চলাইছিল ৷
যি দৃশ্য ঘটনাৰ সমগ্ৰ ঘটনা বন্দী হৈছিল কেমেৰাত । ইপিনে এই অসৎ কাৰ্যৰ ভিডিঅ' ভাইৰেল হোৱাৰ পিছতেই ৰাজ্যজুৰি সামাজিক মাধ্যমত তীব্ৰ প্ৰতিক্ৰিয়াৰ সৃষ্টি হৈছিল । উল্লেখ কৰাৰ প্ৰয়োজন যে, অভিনেতা হিচাপে পৰিচিত ৰিতুৰাজে বহুকেইখন ধাৰাবাহিকতো অভিনয় কৰিছে । সম্প্ৰতি ঘটনা সন্দৰ্ভত অসম আৰক্ষীৰ বিশেষ আৰক্ষী সঞ্চালক প্ৰধান জিপি সিঙে ইতিমধ্যে টুইটাৰ যোগে ৰিতুৰাজক গ্ৰেপ্তাৰৰ কৰাৰ কথা সদৰী কৰিছে ।
লগতে পঢ়কঃ বেংকত শাৰী পাতি থকা মহিলাক অশালীন ব্যৱহাৰ; প্ৰতিক্ৰিয়া নাৰী সংগঠনৰ
