আমগুৰিত এটা নাহৰফুটুকীৰ ৰহস্যজনক মৃত্যু

শিৱসাগৰৰ আমগুৰিত এটা মৃত নাহৰফুটুকী উদ্ধাৰ ৷ বৰ্তমানলৈ জানিব পৰা হোৱা নাই মৃত্যুৰ কাৰণ

আমগুৰি ১৮ নৱেম্বৰ: শিৱসাগৰ জিলাৰ আমগুৰি চাউদাং গাঁৱত এটা ৰহস্যজনকভাৱে মৃত অৱস্থাত এটা নাহৰফুটুকী উদ্ধাৰ । ঘটনা অনুসৰি গাঁও খনৰ চাউদাং হাবিত এজন ব্যক্তিয়ে বেতগছ আনিবলৈ যাওঁতে প্ৰকাণ্ড নাহৰফুটুকীটো প্ৰত্যক্ষ কৰে । ব্যক্তিজনে স্থানীয় লোকক হাবিত নাহৰফুটুকী বাঘ মৰি থকা বুলি অৱগত কৰাত বাঘ চাবলৈ বহু লোকৰ সমাগম হয়। উল্লেখ্য যে দীৰ্ঘদিন ধৰি অঞ্চলটোত গৰু-ছাগলী ভক্ষণ কৰি সন্ত্ৰাস চলাই অহা নাহৰফুটুকী বাঘটো কি কাৰণত মৃত্যু হ'ল বৰ্তমানলৈ জানিব পৰা নাই । ইফালে বহু পলমকৈ ঘটনাস্থলীত আমগুৰি বন বিভাগ উপস্থিত হৈ বাঘটোৰ মৰণোত্তৰ পৰীক্ষা সম্পন্ন কৰে । বনবিভাগে জনোৱা মতে বাঘটোৰ বয়স প্ৰায় পোন্ধৰ বছৰ হ'ব । ইফালে মৃত বাঘটোৰ কাষত এটা মৃত গৰু পোৱালি পৰি থকা ঘটনাই বাঘটোৰ মৃত্যুৰ কাৰণ ৰহস্যজনক কৰি তুলিছে । আমগুৰি বন বিভাগে ইতিমধ্যে বাঘটো জ্বলাই পেলোৱাৰ লগতে মৰণোত্তৰ পৰীক্ষাৰ ৰিপ'ৰ্টৰ পিছতহে তদন্ত কৰিব পাৰিব বুলি প্ৰকাশ কৰিছে । আনহাতে চাউদাং হাবিখনত বন বিভাগে বাঘৰ পোৱালিৰ খোজ প্ৰত্যক্ষ কৰা বুলি প্ৰকাশ কৰিছে ।