যোৰহাট লোকসভা সমষ্টিৰ ভোটাৰ তালিকাত সংযোজন ডেৰ লাখৰো অধিক নতুন ভোটাৰ

নিৰ্ণায়ক ভূমিকা লোৱাৰ সম্ভাৱনা এইসকল নতুন প্ৰজন্মৰ ভোটাৰৰৰ

শিৱসাগৰ,28 মাৰ্চ : আগন্তুক লোকসভা নিৰ্বাচনৰ বাবে যোৰহাট লোকসভা সমষ্টিৰ অন্তৰ্গত দহটা বিধান সভা সমষ্টিৰ ভোটাৰ তালিকাত সংযোজন হ’ল ডেৰ লাখৰো অধিক নতুন ভোটাৰ ৷ ২০১৪ চনৰ লোকসভা নিৰ্বাচনৰ তুলনাত এইবাৰৰ নিৰ্বাচনৰ বাবে বৃদ্ধি পাইছে এই বৃহৎ পৰিমাণৰ ভোটাৰৰ সংখ্যা । এই বৃহৎ সংখ্যক ভোটাৰে প্ৰাৰ্থী নিৰ্বাচনত গ্ৰহণ কৰিব পাৰে নিৰ্ণায়ক ভূমিকা ।

চৰকাৰী তথ্য অনুসৰি ২০১৪ চনৰ ১১,৮৯,৪৮৬ গৰাকী ভোটাৰৰ বিপৰীতে ২০১৯ ৰ নিৰ্বাচনত ভোটাৰৰ সংখ্যা হৈছে প্ৰায় ১৩,৪৩,৮৭২ গৰাকী । উল্লেখ্য যে বৃদ্ধি পোৱা সৰহ সংখ্যক ভোটাৰ ১৮ বছৰ বয়সৰ পৰা ২১ বছৰ বয়সৰ ভিতৰৰ ৷ নতুন প্ৰজন্মৰ এইসকল ভোটাৰ শিক্ষিত,বিবেকবান,দলীয় আদৰ্শক লৈ সচেতন হোৱাৰ উপৰিও পৰিস্থিতিক লৈ সচেতন হোৱাৰ বাবে নিজৰ বিচাৰ-বিবেচনাৰে ভোট প্ৰদান কৰাৰ প্ৰৱল সম্ভাৱনা আছে ৷ গতিকে এনে পৰিস্থিতিত এই বৃহৎ সংখ্যক ভোটাৰে যিকোনো প্ৰাৰ্থীৰ ভৱিষ্যত নিৰ্ধাৰণতগুৰুত্বপূৰ্ণ ভূমিকা গ্ৰহণকৰাৰ পূৰ্ণ সম্ভাৱনা আছে ৷

তথ্য অনুসৰি, কেৱল শিৱসাগৰ জিলাৰ তিনি সমষ্টি ক্ৰমে আমগুৰি, থাওৰা আৰু শিৱসাগৰ সমষ্টিত বৃদ্ধি পাইছে ৪৮,৬৮১ গৰাকী ভোটাৰ । সেইদৰে যোৰহাট লোকসভা সমষ্টিৰ অন্তৰ্গত যোৰহাট, মৰিয়নি,তিতাবৰ,টিয়ক,নাজিৰা,সোণাৰি,মাহমৰাকে ধৰি মুঠ দহটা সমষ্টিত বৃদ্ধি পাইছে প্ৰায় ১৫,৯০,৪৮ সংখ্যক ভোটাৰ । এতিয়া গুৰুত্বপূৰ্ণ বিষয়টো হ’ল নতুন প্ৰজন্মৰ এই সকল ভোটাৰে কি বিচাৰে? নিৰ্বাচনত অৱৰ্তীণ হোৱা প্ৰাৰ্থীক লৈ কিমান আশাবাদী এইসকল ভোটাৰ ? এই সন্দৰ্ভত আমাৰ এক বিশেষ প্ৰতিবেদন ৷