শিবিৰত ভাইৰেল জ্বৰ

নমাটিৰ আশ্ৰয় শিবিৰত ভাইৰেল জ্বৰৰ প্ৰাদুৰ্ভাৱ ৷ দহ জনৰো অধিক লোক আক্ৰান্ত জ্বৰত ৷ ঠেলাত নি এম্বুলেঞ্চত উঠাবলগীয়া হৈছে ৰোগীক

নলবাৰী, 25 জুলাই : নলবাৰীৰ নমাটিৰ আশ্ৰয় শিবিৰত হাহাকাৰ পৰিস্থিতিৰ সৃষ্টি ৷ বানৰ তাণ্ডৱৰ মাজতে আশ্ৰয় শিবিৰত এতিয়া দেখা দিছে ভাইৰেল জ্বৰে ৷ প্ৰায় ডেৰ শতাধিক বন্যাৰ্তই আশ্ৰয় লৈ থকা শিবিৰটোত সম্প্ৰতি দহ জনৰো অধিক লোকৰ মাজত ভাইৰেল বিয়পি পৰাত হাহাকাৰ অৱস্থাৰ সৃষ্টি হৈছে । ইফালে, বানে তচনচ কৰি পেলাইছে ৰাস্তা - ঘাটৰ অৱস্থা ৷ ফলত উপযুক্ত চিকিৎসা লাভ কৰিব পৰা নাই ৰোগীসকলে ৷ ঠেলাৰে কঢ়িয়াব লগীয়া হৈছে ৰোগীক ৷ স্থানীয় লোকে ১০২ এম্বুলেঞ্চক খবৰ দিয়াৰ লগে লগে উপস্থিত হয় যদিও যাতায়তৰ বাবে আধাতে থমকি ৰব লগা হয় এম্বুলেঞ্চ । পিছত আশ্ৰয় শিবিৰৰ লোক সকলে শিবিৰৰ পৰা ৰোগীসকলক একাঠু পানীৰ মাজৰে এখন ঠেলাত নি এম্বুলেঞ্চত উঠাই দিয়ে । পিছত ৰোগী কেইগৰাকীক নলবাৰী অসামৰিক চিকিৎসালয়ত ভৰ্তি কৰা হয়। শিবিৰত ঔষধ আৰু উপযুক্ত চিকিৎসাৰ অভাৱত শংকিত হৈ পৰিছে ৰোগীৰ লগতে আন আন লোকসকল ।