INDIA ই অসমতো বৰ্জন কৰিব একপক্ষীয় সাংবাদিকক নলবাৰী,১৬ ছেপ্টেম্বৰ: শনিবাৰে নলবাৰীত উপস্থিত হয় বিৰোধী দলৰ উপ-দলপতি ৰকিবুল হুছেইন । বৰপেটালৈ যাত্ৰাপথত নলবাৰীৰ কাপলাবড়ীস্থিত বিধায়ক দিগন্ত বৰ্মনৰ ঘৰত উপস্থিত হয় নেতাগৰাকী । কাপলাবড়ীত উপস্থিত হৈ সাংবাদিকৰে কেইবাটাও প্ৰসংগত মত ব্যক্ত কৰে বিৰোধী দলৰ উপ-দলপতি তথা বিধায়কগৰাকীয়ে । নলবাৰী দিশে আহিলে প্ৰয়াত প্ৰাক্তন মুখ্যমন্ত্ৰী ভূমিধৰ বৰ্মনৰ বাসগৃহত প্ৰায়ে সোমাই যায় বুলি জনাই ৰকিবুল হুছেইনে ।
ইয়াৰ পাছতে সাংবাদিক বৰ্জন প্ৰংসগতো মত ব্যক্ত কৰে হুছেইনে । I.N.D.I.A ই ৰাষ্ট্ৰীয় সংবাদমাধ্যমৰ কেইবাগৰাকীও সাংবাদিকক বৰ্জন কৰাৰ দৰে অসমতো একপক্ষীয় সাংবাদিকক বৰ্জন কৰাৰ ইংগিত প্ৰদান কৰে ৰকিবুল হুছেইনে । I.N.D.I.A ই ৰাষ্ট্ৰীয় সংবাদ মাধ্যমৰ ১৪ গৰাকীকৈ সাংবাদিকক বৰ্জন কৰাৰ পিছত অসমটো একাংশ একপক্ষীয় সাংবাদিক আছে বুলি কয় বিধায়কগৰাকীয়ে ।
অসমৰ সেইসকল সাংবাদিকক নিৰপেক্ষ ভূমিকা পালন কৰিবলৈ আহ্বান ৰকিবুল হুছেইনৰ । সময় থাকোতেই তেওঁলোকে নিজকে সংশোধন নকৰিলে পৰৱৰ্তী সময়ত তেওঁলোককো বৰ্জন কৰাৰ ইংগিত দিয়ে ৰকিবুল হুছেইনে । ইয়াৰোপৰি বিধায়কগৰাকীয়ে কয় যে সমষ্টি পুনঃনিৰ্ধাৰণে বৰক্ষেত্ৰী সমষ্টিত বিধায়ক দিগন্ত বৰ্মনক যথেষ্ট সহায় কৰিব আৰু পৰৱৰ্তী বিধানসভা নিৰ্বাচনত বৰক্ষেত্ৰী সমষ্টি পুনৰ কংগ্ৰেছে দখল কৰিব ।
ইফালে মুখ্যমন্ত্ৰী পত্নীৰ ভূমি আৰু ৰাজসাহায্যৰ বিতৰ্ক সন্দৰ্ভত ৰকিবুল হুছেইনে কয় যে বিধানসভাত বিৰোধীক এই বিষয়ে ভালদৰে কবলৈ দিয়া হোৱা নাই । এই প্ৰসংগ উত্থাপন কৰোঁতেই বিৰোধীৰ টেঁটু চেপি ধৰিছে । কিন্তু তাৰ পিচতো বিৰোধীয়ে বিষয়টো উত্থাপন কৰিছে । মুখ্যমন্ত্ৰীয়ে টুলুঙা মন্তব্য কৰি থকাতকৈ সন্মুখৰ পৰা আহি উত্তৰ দিব লাগে । এই সমগ্ৰ বিষয়টোৰ এক উচ্চ পৰ্যায়ৰ তদন্ত হ'ব লাগে বুলি দাবী কৰে ৰকিবুল হুছেইনে ।
লগতে পঢ়ক:Mysterious death Dhanti Heera : পুত্ৰৰ মৃত্যুৰ ন্যায় বিচাৰি নগাঁৱত ধন্তি হীৰাৰ মাতৃৰ সংবাদমেল
