নলবাৰী,1 ডিচেম্বৰ: নলবাৰীৰ মুকালমুৱাত আৰক্ষী আক্ৰমণৰ ঘটনা ৷ গৰু চোৰ আবু বক্কাৰ ছিদ্দিক আৰু তেওঁৰ পৰিয়ালৰ ভয়াৱহ আক্ৰমণৰ বলি মুকালমুৱা আৰক্ষী থানাৰ চাৰি গৰাকীকৈ আৰক্ষী ৷ মুকালমুৱাৰ কুৰৱৰীত গৰু চোৰৰ বিৰুদ্ধে চলোৱা অভিযানত মুকালমুৱা আৰক্ষী থানাৰ সহকাৰী উপ-পৰিদৰ্শক মকছেদ আলী আৰু অসম আৰক্ষী বাহিনীৰ জোৱান ক্ৰমে কন্দৰ্প নাথ,তপন দাস আৰু নয়ন তালুকদাৰ গুৰুতৰ ভাৱে আহত হয় ৷
দীৰ্ঘদিনৰ পৰা মুকালমুৱাত অব্যাহত আছে গৰু চোৰৰ ঘটনা ৷ আবু বক্কাৰ ছিদ্দিক নামৰ দুধৰ্ষ গৰু চোৰজনে আৰক্ষীৰ চকুত ধূলি দি দীৰ্ঘদিনৰ পৰা গৰু চুৰি কাণ্ডৰ লগত জড়িত হৈ আছিল ৷ সোমবাৰে নলবাৰী আৰক্ষীৰ উপ আৰক্ষী অধীক্ষক ছফিকুল হুছেইনৰ নেতৃত্বত গৰু চোৰ আবু বক্কাৰ ছিদ্দিকৰ বাসগৃহত চলিছিল অভিযান ৷ মুকালমুৱা আৰক্ষী থানাত আবু বক্কাৰ ছিদ্দিকৰ বিৰুদ্ধে ৰুজু হৈ থকা 293,351,307/2020 গোচৰৰ ভিত্তিতে উপ আৰক্ষী অধীক্ষক গৰাকীয়ে চলাইছিল অভিযান ৷ অভিযান কালতে ছিদ্দিক আৰু তেওঁৰ পৰিয়ালে আক্ৰমণ চলাই আৰক্ষীৰ দলটোৰ ওপৰত ৷