স্কুটী নাপালে ভোট নিদিয়ে নলবাৰীৰ এইসকল ছাত্ৰীয়ে !

শ্ৰেণীকোঠা এৰি স্কুটি বিচাৰি প্ৰতিবাদত বহিল নলবাৰীৰ একাংশ ছাত্ৰী ৷ স্কুটি নাপালে আগন্তুক নিৰ্বাচনত ভোট নিদিয়াৰ হুংকাৰ প্ৰতিবাদী ছাত্ৰীৰ ৷ স্কুটি প্ৰদান কৰাৰ বাবে ব্যৱস্থা গ্ৰহণ কৰাৰ উদ্দেশ্যে মন্ত্ৰী হিমন্ত বিশ্ব শৰ্মাক নিৰ্দিষ্ট সময়সীমা বান্ধি দিলে এইসকল ছাত্ৰীয়ে ৷ 60 শতাংশ নম্বৰ পোৱাৰ পাছতো স্কুটি লাভ কৰাৰ পৰা বঞ্চিত হোৱাৰ অভিযোগ প্ৰতিবাদী ছাত্ৰীৰ ৷

নলবাৰী, 17 ফেব্ৰুৱাৰী:অসম চৰকাৰৰ পৰা স্কুটি নাপালে সমাগত অসম বিধানসভা নিৰ্বাচনত ভোট বৰ্জন কৰাৰ হুংকাৰ দিছে নলবাৰীৰ একাংশ ছাত্ৰীয়ে ৷ বুধবাৰে নলবাৰী জিলাৰ সুধাকন্ঠ ড৹ ভূপেন হাজৰিকা শিশু উদ্যানৰ সন্মুখত প্ৰতিবাদ সাব্যস্ত কৰি 20 ফেব্ৰুৱাৰীৰ ভিতৰত স্কুটী প্ৰদান কৰাৰ বাবে শীঘ্ৰে ব্যৱস্থা গ্ৰহণ কৰাৰ বাবে দাবী উত্থাপন কৰিছে প্ৰতিবাদী ছাত্ৰী সকলে ৷

উল্লেখ্য যে, প্ৰজ্ঞান ভাৰতী আৰু জ্ঞান দিপীকা আঁচনি 2019 জৰিয়তে উচ্চতৰ মাধ্যমিকত প্ৰথম বিভাগ পোৱা ছাত্ৰী সকলক স্কুটি দিয়াৰ বাবে ৰাজ্য চৰকাৰে বিশেষ ব্যৱস্থা গ্ৰহণ কৰিছিল ৷ উক্ত আঁচনিৰ জৰিয়তে ইতিমধ্যে বহু ছাত্ৰীয়ে একোখনকৈ স্কুটি লাভ কৰিবলৈ সক্ষম হ'ল যদিও প্ৰথম বিভাগ লাভ কৰিও বহু ছাত্ৰী স্কুটি লাভ নকৰাৰ অভিযোগ উত্থাপিত হৈছে ৷

প্ৰতিবাদী ছাত্ৰী সকলৰ মন্তব্য অনুসৰি তেওঁলোকে 2019 চনত 60 শতাংশ নম্বৰ লাভ কৰি উচ্চতৰ মাধ্যমিকত প্ৰথম বিভাগত উত্তীৰ্ণ হৈছিল যদিও স্কুটি লাভ কৰাৰ বঞ্চিত হৈ ৰ'ল ৷ সেয়ে, স্কুটি লাভ নকৰি ক্ষোভিত হৈ পৰা ছাত্ৰ ছাত্ৰী সকলে তেওঁলোকক স্কুটী প্ৰদান কৰাৰ বাবে বুধবাৰে ৰাজ্যৰ শিক্ষামন্ত্ৰী ড৹ হিমন্ত বিশ্ব শৰ্মাক বান্ধি দিলে নিৰ্দিষ্ট সময়সীমা ৷

বিভিন্ন চৰকাৰ বিৰোধী শ্ল'গানেৰে প্ৰতিবাদথলী উত্তাল কৰি তুলি ছাত্ৰী সকলে আগন্তুক 20 ফেব্ৰুৱাৰীৰ ভিতৰত স্কুটী প্ৰদান নকৰিলে সমাগত অসম বিধানসভা নিৰ্বাচনত ভোটাধিকাৰ সাব্যস্ত নকৰাৰ হুংকাৰ দিয়া পৰিলক্ষিত হয় ৷

লগতে পঢ়ক:নলবাৰীত উপস্থিত অসম বচাও অভিযানৰ দল