নলবাৰী, 19 অক্টোবৰ : নলবাৰীৰ সমাজহিতৈষী নাগৰিক ঐতিহ্যমণ্ডিত শ্ৰী শ্ৰী হৰি মন্দিৰ সমিতিৰ সভাপতি চন্দ্ৰ কলিতাৰ বৃহস্পতিবাৰে সন্ধিয়া মহানগৰীৰ এখন ব্যক্তিগত চিকিৎসালয়ত ৮৬ বছৰ বয়সত পৰলোকপ্ৰাপ্তি ঘটে । সুদীৰ্ঘ ১৯৯৭ চনৰ পৰাই নলবাৰীৰ ঐতিহ্যমণ্ডিত হৰিমন্দিৰক নেতৃত্ব প্ৰদান কৰা কলিতা ২০০৪ চনৰ পৰা ২০০৭ চনলৈ নলবাৰী পৌৰসভাৰ পৌৰপতি হিচাপে কাৰ্যনিৰ্বাহ কৰিছিল।
বৃহস্পতিবাৰে নিশা কলিতাৰ নশ্বৰ দেহ স্ব-গৃহ আহি পোৱাৰ পিচত শুকুৰবাৰে পুৱাৰ ভাগত জিলা উপায়ুক্ত, স্থানীয় বিধায়ক অশোক শৰ্মাই অন্তিম শ্ৰদ্ধাঞ্জলি জ্ঞাপন কৰে । শ্ৰী শ্ৰী হৰি মন্দিৰৰ লগতে নলবাৰী জিলা ছাত্ৰ সন্থাৰ কাৰ্যলয়ৰ বাকৰিলৈ কলিতাৰ নশ্বৰ দেহ এক সমদল কৰি লৈ অহাৰ পিচত আছু, যুৱ-ছাত্ৰ পৰিষদ, সাংবাদিক সন্থাকে ধৰি জিলাখনৰ বিভিন্ন অনুষ্ঠান-প্ৰতিষ্ঠানে অন্তিম শ্ৰদ্ধাঞ্জলি জ্ঞাপন কৰে ।
উল্লেখযোগ্য যে মৃত্যুৰ সময়লৈকে চন্দ্ৰ কলিতা শ্ৰীমন্ত শংকৰদেৱ সাংস্কৃতিক প্ৰকল্পৰ সভাপতি হিচাপেও কাৰ্যনিৰ্বাহ কৰি আছিল । শ্ৰী মন্ত শংকৰদেৱ সংঘৰ ৫৪ আৰু ৭৬ সংখ্যক নলবাৰী অধিৱেশনৰ আদৰণি সমিতিৰ সভাপতি পদতো অধিষ্ঠিত হোৱা প্ৰয়াত কলিতা নলবাৰী ক্ৰীড়া সন্থাৰ সভাপতিৰ লগতে অসম অলিম্পিক সন্থাৰো সদস্য হিচাপে কাৰ্যনিৰ্বাহ কৰিছিল । বিশিষ্ট সমাজকৰ্মী গৰাকীৰ মৃত্যুত শুকুৰবাৰে নলবাৰী চহৰত পুৱা ৬ বজাৰ পৰা দুপৰীয়া ১ বজালৈ দোকান-পোহাৰ বন্ধ ৰাখি শোক পালন কৰা হয় ।