নলবাৰী, 27 অক্টোবৰ: "আমাৰ অসমত অসমীয়া বুলিয়েই আমি সকলো পৰিচিত ৷ ইয়াৰ কোনো মিঞা বা অন্য ধৰণৰ প্ৰথা নাই ৷ বিভিন্ন জাতি-জনগোষ্ঠীৰ লোকৰে মিলি আমি বৰ অসম গঢ়িবলৈ চেষ্টা কৰি আছো ৷ গতিকে এই মিঞা মিউজিয়ামে খিলঞ্জীয়া মুছলমানখিনিৰ লগতে অসমৰ অসমীয়াৰ আবেগৰ লগত খেলা কৰিব বিচাৰিছে ৷ ইয়াৰ অন্তৰালত হয়তু জেহাদী শক্তিৰ হাত থাকিবও পাৰে ৷ এই গোটেই বিষয়টোৰ সন্দৰ্ভত চৰকাৰে তদন্ত কৰি আছে ৷ ইতিমধ্যে এই তদন্তৰ পৰা কিছু তথ্যও পোহৰলৈ আহিছে ৷ যিহেতু এতিয়াও তদন্ত প্ৰক্ৰিয়া চলি আছে গোটেই কথাখিনি আমি ক’ব নোৱাৰো ৷" মিঞা মিউজিয়াম সন্দৰ্ভত বিস্ফোৰক মন্তব্য বিজেপিৰ ৰাষ্ট্ৰীয় সাধাৰণ সম্পাদক তথা সাংসদ দিলীপ শইকীয়াৰ (MP Dilip Saikia On Miya Museum Controversy)৷
তেওঁ লগতে কয় যে অসমত কিন্তু মিঞা মিউজিয়াম হ’ব নোৱাৰে ৷ এইটো একদম ধ্ৰুৱসত্য কথা ৷ মিঞা মিউজিয়ামৰ জৰিয়তে আমাৰ যি অসমীয়া জাতীয় চেতনা, সংস্কৃতি সেইটো সমৃদ্ধ নহ’ব ৷ এইটোৱেই আমাৰ মাজত বিভাজন আৰু অবিশ্বাসৰ বাতাবৰণ সৃষ্টি কৰিব ৷ "মিঞাৰ কথা ক’লে কিছুমানে ভোটবেংকৰ ৰাজনীতি বুলি ভাৱে ৷ কংগ্ৰেছ, অসম জাতীয় পৰিষদ, অখিল গগৈ কোনেও মাত নামাতে ৷ মিঞা শব্দটো সন্মানসূচক শব্দ কিন্তু অসমত মিঞা মানে পূৰ্ববংগীয় মুছলমান, বাংলাদেশী মুছলমানক বুজোৱা হয় ৷ তেওঁলোক অসমত কিয় আহিছে, কেনেধৰণে আহিছে সেইটো সকলোৱে জানে ৷