বকোত পথ দুৰ্ঘটনাত মৃত্যু অভিনেতা ৰাজমোহন ৰাভাৰ; নলবাৰীতো ডাম্পাৰৰ খুন্দাত প্ৰাণ গ'ল এজনৰ

গনেশ মন্দিৰ পথত সংঘটিত হ'ল এই ভয়াবহ দুৰ্ঘটনা ৷ দুই পথচাৰীকো মহতিয়ালে তীব্ৰবেগী ডাম্পাৰে ৷ সংকটজনক অৱস্থাত দুয়োকে নলবাৰী অসামৰিক চিকিৎসালয়ত ভৰ্তি ৷ নিশা বকোৰ শাখাতিতো ভয়াবহ পথ দুৰ্ঘটনা ৷ স্কুটি ট্ৰাকৰ সংঘৰ্ষত থিতাতে প্ৰাণ গ'ল মঞ্চৰূপা থিয়েটাৰৰ অভিনেতা ৰাজমোহন ৰাভাৰ ৷

নিউজ ডেস্ক, 6 ডিচেম্বৰ: শুকুৰবাৰৰ দিনটোত ৰাজ্যৰ বিভিন্ন প্ৰান্তত সংঘটিত হল শোকাৱহ পথ দুৰ্ঘটনা ৷ কালিকালগা দিনটোতেই নলবাৰী আৰু বকোত সংঘটিত পৃথক-পৃথক পথ দুৰ্ঘটনাত থিতাতে মৃত্যুক সাৱটি ল'লে দুজনকৈ লোকে ৷

নলবাৰীত আজি দিনৰ ভাগত সংঘটিত হ'ল এক ভয়ংকৰ পথ দুৰ্ঘটনা ৷ চহৰখনত দিনক দিনে বৃদ্ধি পোৱা তীব্ৰবেগী ডাম্পাৰৰ দৌৰাত্মৰ ফলস্বৰূপেই অত্যাধিক বেগত থকা এখন ডাম্পাৰে মহতিয়াই নিলে এজন চাইকেল আৰোহীৰ লগতে কাষেৰে পাৰ হৈ যোৱা দুই পথচাৰীক ৷ দুৰ্ঘটনাটোত চাইকেল আৰোহী জন থিতাতে নিহত হোৱাৰ লগতে আন দুজন গুৰুত্বৰভাৱে আহত লোকক স্থানীয় লোকে সংকটজনক অৱস্থাত নলবাৰী অসামৰিক চিকিৎসালয়ত ভৰ্তি কৰে ৷

আহত লোক দুজনৰ নাম ক্ৰমে জোন আলী আৰু বৰপেটাৰ প্ৰাঞ্জল কাকতি বুলি জানিব পৰা গৈছে ৷ আৰক্ষীয়ে ইতিমধ্যে দুৰ্ঘটনা সংঘটিত কৰা ডাম্পাৰখন ঘাগ্ৰাপাৰত জব্দ কৰিছে ৷ ইফালে দুৰ্ঘটনা সংঘটিত হোৱাৰ পাছতে ক্ষুব্ধ ৰাইজে দীৰ্ঘ সময় ধৰি 31 নং ৰাষ্ট্ৰীয় ঘাইপথ অৱৰোধ কৰে ৷

বকোৰ শাখাতিতো বৃহস্পতিবাৰে মাজ নিশা এক শোকাবহ পথ দুৰ্ঘটনা সংঘটিত হয় ৷ স্কুটি আৰু ট্ৰাকৰ ভয়াবহ সংঘৰ্ষত প্ৰাণ হেৰুৱালে উদয়মান থিয়েটাৰ অভিনেতা অনুপম কৌশিক ৰাভাই ৷ লগতে দুৰ্ঘটনাটোত আহত হয় আন এগৰাকী অভিনেতা ৰাজমোহন ৰাভা ৷ আহত গৰাকীক সংকটজনক অৱস্থাত নিশাই গুৱাহাটীস্থিত জি এন আৰ চিত ভৰ্তি কৰোৱা হয় ৷ উল্লেখযোগ্য যে, নিহত অভিনেতা ৰাজমোহন ৰাভা মঞ্চৰূপা থিয়েটাৰৰ সৈতে জড়িত আছিল ইয়াৰোপৰি তেওঁ বিশিষ্ট অভিনেতা স্বৰ্গীয় কমলা ৰাভাৰ পুত্ৰ ৷

নিহত অভিনেতা অনুপম কৌশিক ৰাভা

আৰু পঢ়ক: শুৱালকুছিৰ সাধুটোলত ন- বোৱাৰীৰ ৰহস্যজনক আত্মহত্যা