নলবাৰী, 14 অক্টোবৰ: নলবাৰীত বিদ্যালয়ৰ প্ৰধান শিক্ষক আৰু বিদ্যালয়ৰ পৰিদৰ্শকৰ ওপৰত সৰৱ হৈ পৰে মন্ত্ৰী জয়ন্ত মল্ল বৰুৱা । শুকুৰবাৰে গৰ্ডন খেলপথাৰত আয়োজিত হোৱা অসম চৰকাৰৰ বিনামূলীয়া চাইকেল বিতৰণৰ শুভ উদ্বোধনী অনুষ্ঠানত অংশগ্ৰহণ কৰি সৰৱ হৈ উঠে মন্ত্ৰী গৰাকী । অসম চৰকাৰৰ খেল মহাৰণ আৰু সাংস্কৃতিক মহাৰণত ছাত্র ছাত্ৰী সকলে সন্নিবিষ্ট হৈছে নে নাই তাক লৈ মন্ত্ৰী জয়ন্ত মল্ল বৰুৱাই অনুষ্ঠানৰ ভাষণৰ মাজতে ছাত্র-ছাত্ৰীসকলক প্ৰশ্ন তুলি হাত দাঙিবলৈ দিয়ে ।
ইয়াৰে খেল মহাৰণত অধিকাংশ শিক্ষাৰ্থীয়ে সন্নিৱিষ্ট হৈছে যদিও সাংস্কৃতিক মহাৰণত ১০ শতাংশ ছাত্র-ছাত্ৰীও সন্নিৱিষ্ট নোহোৱা বাবে মন্ত্ৰী জয়ন্ত মল্ল বৰুৱাই পোনতে সৰৱ হৈ উঠে নলবাৰী জিলাৰ বিদ্যালয়সমূহৰ পৰিদৰ্শকৰ বিৰুদ্ধে । ভাষণ প্ৰসংগত মন্ত্ৰীগৰাকীয়ে পৰিদৰ্শকগৰাকীক অতি সোনকালে ছাত্র-ছাত্ৰীক সাংস্কৃতিক মহাৰণত সন্নিৱিষ্ট কৰাবলৈ নিৰ্দেশ দিয়ে । লগতে যিবোৰ বিদ্যালয়ত বৰ্তমানলৈ ছাত্র-ছাত্ৰীক খেল মহাৰণ আৰু সাংস্কৃতিক মহাৰণত সন্নিৱিষ্ট কৰোৱা নাই, সেইসমূহ বিদ্যালয়ৰ প্ৰধান শিক্ষক সকলক মুকলি মঞ্চৰ পৰা সকিয়নী প্ৰদান কৰে ।