নলবাৰীত বানৰ সংহাৰী ৰূপ

বানপানীৰ কবলত নলবাৰীৰ ৯০ খন গাঁও । বৃদ্ধি পাইছে বানৰ কবলত পৰা ঠাইৰ সংখ্যা ।

নলবাৰী, 15 জুলাই : নেৰানেপেৰা বৰষুণ আৰু ভূটানৰ পৰা নামি অহা পানীৰ ফলত ওফন্দি উঠা নৈসমূহৰ ফলত নলবাৰীত বান পৰিস্থিতিয়ে সংহাৰী ৰূপ ধাৰণ কৰিছে ৷ নলবাৰীৰ বিভিন্ন প্ৰান্তৰ লগতে পশ্চিম নলবাৰী অঞ্চলত বিশেষকৈ বুঢ়াদিয়া আৰু মৰা পাগলদিয়াই কেইবাঠাইটো মাথাউৰি ভাঙি জলমগ্ন কৰিছে বিস্তীৰ্ণ অঞ্চল, যাৰ ফলত বানপিড়িত অঞ্চলৰ ৰাইজে আশ্ৰয় লব লগা হৈছে ওখ ঠাইত । জিলা প্ৰশাসনৰ তথ্য অনুসৰি ৯০ খন গাওঁ বানৰ কবলত,৭২৬০০ গৰাকী লোক বানপানীৰ কবলত জিলাখনত । ৪১৯৮ হেক্টৰ কৃষি ভূমিৰ লগতে ৮৪১৪৪ টা সৰু ডাঙৰ পশুৰ লগতে ৪০৩৭৯ টা হাঁহ-কুকুৰা বানৰ কবলত পৰিছে । জিলাপ্ৰশাসনৰ পৰা যদিও ২২ টা সাহাৰ্য্য শিবিৰ বানপিড়িত ৰাইজৰ বাবে দিয়া হৈছে যদিও এতিয়াও বিভিন্ন প্ৰান্তত কোনো ধৰণৰ সাহায্য নোপোৱাৰ অভিযোগ উত্থাপন হৈছে । ইয়াৰ উপৰিও বিভিন্ন প্ৰান্তত মীন পালনেৰে জীবিকা নিৰ্বাহ কৰা ঠাইসমূহত পুখুৰী সমূহ পানীৰ কবলত পৰাত লক্ষাধিক টকাৰ লোকচানৰ সন্মুখীন হৈছে মীন পালক সকল । সোমবাৰেও নেৰানেপেৰা বৰষুণৰ ফলত ন ন অঞ্চল প্লাবিত হোৱাৰ সম্ভাৱনা দেখা গৈছে । বিভিন্ন প্ৰান্তৰ ওপৰত পকী পথৰে বাগৰিছে পানী । নলবাৰীত এতিয়া বানে সংহাৰী ৰূপ ধাৰণ কৰিছে ।