Artificial floods in Nalbari:নলবাৰীৰ বৰক্ষেত্ৰীক কৃত্ৰিম বানমুক্ত কৰাৰ প্ৰয়াস প্ৰশাসনৰ

নলবাৰীৰ খালিহাপাৰা চাকলাত পানী নিষ্কাষণৰ বাবে তৎপৰতা জিলা প্ৰশাসনৰ । পুখুৰীৰ বান্ধ কাটি খেতি পথাৰত কৃত্ৰিম বানমুক্ত কৰাৰ চেষ্টা বৰক্ষেত্ৰী চক্ৰ বিষয়াৰ ।

নলবাৰী, ২ ছেপ্টেম্বৰ : নলবাৰী জিলাৰ বৰক্ষেত্ৰী ৰাজহ চক্ৰৰ অন্তৰ্গত খালিহাপাৰা চাকলাত জিলা প্ৰশাসনে পুখুৰীৰ বান্ধ কাটি পানী নিষ্কাষণৰে কৃত্ৰিম বানমুক্ত কৰিবলৈ ইতিবাচক পদক্ষেপ গ্ৰহণ কৰিছে । কিছুদিন পূৰ্বে বনপুৰা,নাৰুৱা,কালদিকে ধৰি ভিন্ন প্ৰান্তত পানী ওলাই যোৱা পথ সমূহ খুলি কৃষককৰ সমস্যা সমাধান কৰিছিল বৰক্ষেত্ৰী ৰাজহ চক্ৰ বিষয়াই । শনিবাৰে পুনৰ খেতিপথাৰৰ পথাৰৰ পানী নিষ্কাষণৰ বাবে খালিহাপাৰা-চাকলাৰ কেইবাটাও পুখুৰীৰ বান্ধ কাটি কৃষকৰ সমস্যা সমাধানৰ বাবে পদক্ষেপ গ্ৰহণ কৰে বৰক্ষেত্ৰী প্ৰশাসনে ।

উল্লেখযোগ্য যে একাংশ লোকে নিজৰ সুবিধাৰ বাবে পানী ওলাই যোৱা পথ সমূহ বন্ধ কৰি ৰখাৰ বাবে খেতি পথাৰ কৃত্ৰিম বানৰ কবলত পৰিছিল । যাৰ ফলত বৰক্ষেত্ৰী ৰাজহ চক্ৰৰ অন্তৰ্গত কান্ধবাৰী,দাগাপাৰা,দৰংঙ্গীপাৰা,বালিকুছি,সূতাৰকুছিকে ধৰি কেইবাখনো গাৱঁৰ কৃষকে খেতিপথাৰত খেতি কৰিব পৰা নাই বুলি একাংশ লোকে বৰক্ষেত্ৰী ৰাজহ চক্ৰৰ চক্ৰ বিষয়াক অভিযোগ দাখিল কৰিছিল । চক্ৰ বিষয়া কৌস্তভ ৰয়ে পৰিস্থিতিৰ বুজ লৈ আজি চক্ৰ বিষয়াগৰাকীৰ নেতৃত্বত মুকালমুৱা আৰক্ষীৰ সহযোগত খালিহাপাৰা চাকলাত পানী নিষ্কাষণৰ বাবে কেইবাটাও পুখুৰীৰ বান্ধ খুলি দিয়ে ।

চক্ৰ বিষয়া কৌস্তভ ৰয়ে উল্লেখ কৰা মতে,পানী নিষ্কাষণৰ বাবে এই পদক্ষেপ পৰ্যায় ক্ৰমে অব্যাহত থাকিব । কৃষক সকলৰ খেতি কৰিব পৰাকৈ খেতিপথাৰ সমূহত বানমুক্ত কৰিবলৈ বৰক্ষেত্ৰী ৰাজহ চক্ৰৰ চক্ৰ বিষয়া কৌস্তভ ৰয়ে দেখুওৱা তৎপৰতাই কৃষকসকলৰ দীৰ্ঘদিনীয়া কৃত্ৰিম বানৰ সমস্যা সমাধান হোৱাৰ আশা কৰিছে অঞ্চলটোৰ কৃষকসকলে ।

উল্লেখ্য় যে নলবাৰী জিলাৰ বৰক্ষেত্ৰী অঞ্চলৰ কৃষকসকলৰ এটা দীৰ্ঘদিনীয়া সমস্যা হ'ল খেতিপথাৰৰ কৃত্ৰিম বান । এই কৃত্ৰিম বানৰ বাবে বৰক্ষেত্ৰী ৰাজহ চক্ৰৰ বহুতো গাৱঁৰ কৃষকে শাওনৰ খেতিপথাৰত খেতি কৰিব পৰা নাছিল । অঞ্চলটোৰ খেতিপথাৰৰ পৰা পানী ওলাই যোৱা কালভাৰ্টসমূহ বা পানী ওলাই যোৱা পথবোৰ বন্ধ হৈ থকা বাবে খেতি পথাৰসমূহ জলমগ্ন হৈ আছিল । কৃষকসকলে খেতি কৰিব নোৱাৰি কেইদিনমান পূৰ্বে একাংশ কৃষকে বৰক্ষেত্ৰী ৰাজহ চক্ৰ বিষয়াক অভিযোগ দিয়ে । ইয়াৰ পিছতে বৰক্ষেত্ৰী ৰাজহ চক্ৰৰ চক্ৰ বিষয়া কৌস্তভ ৰয়ে পদক্ষেপ গ্ৰহণ কৰিছে ।

লগতে পঢ়ক:Artificial floods in Nalbari: নলবাৰীক কৃত্ৰিম বানমুক্ত কৰাৰ প্ৰয়াস