নলবাৰী, 7 জুলাই : নিশা আৰক্ষীৰ জেৰাৰ মাজতে পুনৰ অসুস্থ হয় ঘগ্ৰাপাৰ থানাৰ নিলম্বিত আৰক্ষী বিষয়া বিমান ৰয় । হঠাতে নিশা আৰক্ষীৰ জেৰাত শাৰিৰীক অসুস্থতাই দেখা দিয়াত নলবাৰী চিভিল হাস্পতালত স্বাস্থ্য পৰীক্ষাৰ বাবে লৈ যোৱা হয় নিলম্বিত আৰক্ষী বিষয়া বিমান ৰয়ক । নলবাৰী সদৰ থানাত তিনিজনকৈ উচ্চ পদস্থ আৰক্ষী বিষয়াৰ জেৰাৰ সন্মুখীন হৈছিল বিমান ৰয় । নলবাৰী আৰক্ষী অধীক্ষক সুধাকৰ সিং, অতিৰিক্ত আৰক্ষী অধীক্ষক অলিন্দিতা গগৈ আৰু জিকিৰানী মহন্তই চলাইছিল জেৰা । এই সমগ্ৰ ঘটনাটোৰ তদন্তকাৰী বিষয়াৰূপে দায়িত্ব প্ৰদান কৰা হৈছিল নলবাৰীৰ অতিৰিক্ত আৰক্ষী অধীক্ষক অলিন্দিতা গগৈক ।
আজি দুপৰীয়াৰ ভাগত আদালতত হাজিৰ কৰোৱা হ’ব লম্পট বিমান ৰয়ক ৷ উল্লেখ্য যে, ঘগ্ৰাপাৰ আৰক্ষী থানাত এগৰাকী কিশোৰীক উলংগ কৰি ফটো তোলাৰ গুৰুতৰ অভিযোগ উত্থাপিত হৈছিল ভাৰপ্ৰাপ্ত আৰক্ষী বিষয়া বিমান ৰয়ৰ বিৰুদ্ধে ৷ ইয়াৰ পিচতে পলাতক অৱস্থাত আছিল ভাৰপ্ৰাপ্ত আৰক্ষী বিষয়াগৰাকীয়ে । ন দিনৰ অন্তত আৰক্ষীয়ে বৃহস্পতিবাৰে গ্ৰেপ্তাৰ কৰিবলৈ সক্ষম হয় অভিযুক্ত ভাৰপ্ৰাপ্ত আৰক্ষী বিষয়াগৰাকীক ৷