নলবাৰী, 8 ছেপ্টেম্বৰ : নতুন পেন্সন নীতি বাতিল কৰি, পুৰণি পেন্সন নীতি বাহাল ৰখাৰ দাবীৰ লগতে ঠিকাভিত্তিত নিয়োজিত হৈ থকা শিক্ষক সকলক বিনাচৰ্তে চাকৰি নিয়মীয়াকৰণ কৰাৰ দাবীৰে শুকুৰবাৰে প্ৰাথমিক শিক্ষক সন্থাই প্ৰতিবাদী কাৰ্যসূচীৰ লগতে এক সভা অনুষ্ঠিত কৰে ৷ নলবাৰী হৰিমন্দিৰ প্ৰাংগনত দহখনকৈ মহকুমাৰ প্ৰাথমিক শিক্ষকসকলে একত্ৰিত হৈ চৰকাৰৰ এই হঠকাৰী সিদ্ধান্তৰ বিৰুদ্ধে প্ৰতিবাদমুখৰ হৈ পৰে ৷
উল্লেখযোগ্য যে নলবাৰী, ৰঙিয়া, মুছলপুৰ, তামুলপুৰ, ভেৰাগাঁও, মানিকপুৰ, শালবাৰী, বজালী, বৰপেটা আৰু বিজনী মহকুমাৰ প্ৰাথমিক শিক্ষক সন্থাই 5 ছেপ্তেম্বৰৰ পৰা 5 অক্টোবৰলৈ মাহজোৰা সমগ্ৰ দেশৰ ভিন্ন প্ৰান্তত "ভাৰত যাত্ৰা" কাৰ্যসূচী অব্যাহত ৰাখিছে ৷ চৰকাৰৰ সিদ্ধান্তক হঠকাৰী সিদ্ধান্ত বুলি বিবেচনা কৰি এই নীতিসমূহৰ বিৰুদ্ধে প্ৰাথমিক শিক্ষক সন্থাই মাহজোৰা কাৰ্যসূচীৰে অব্যাহত ৰাখিছে "ভাৰত যাত্ৰা" কাৰ্যসূচী ৷ শুকুৰবাৰে এই যাত্ৰা পথতে নলবাৰীৰ শ্ৰী শ্ৰী হৰিমন্দিৰ চৌহদত অখিল ভাৰতীয় প্ৰাথমিক শিক্ষক সংঘৰ আহ্বানত অসম ৰাজ্যিক প্ৰাথমিক শিক্ষক সন্মিলনৰ উদ্যোগত আৰু জিলা প্ৰাথমিক শিক্ষক সন্থাৰ সহযোগত এখন বিশাল সভা অনুষ্ঠিত কৰা হয় ৷