নলবাৰী, ৫ নৱেম্বৰ:এগৰাকী শিল্পীয়ে অন্য এগৰাকী শিল্পীলৈ দেখুৱালে মহানুভৱতা । নলবাৰীত জনপ্ৰিয় অভিনেত্ৰী বৰষা ৰাণী বিষয়াই দেখুৱালে মহানুভৱতাৰ নিদৰ্শন । নলবাৰী নাট্য মন্দিৰত শনিবাৰে নিশা অনুষ্ঠিত হৈছিল ৰামচৰণ তামুলী সোঁৱৰণী দ্বিতীয় বাৰ্ষিক শিল্পী বঁটা প্ৰদান অনুষ্ঠান । এই বঁটা প্ৰদান কৰা হয় অভিনেত্ৰী বৰষা ৰাণী বিষয়াক ।
বৰষা ৰাণী বিষয়াই এই অনুষ্ঠানত উপস্থিত থাকি বঁটা গ্ৰহণ কৰে । ৰামচৰণ তামুলী সোঁৱৰণী দ্বিতীয় বাৰ্ষিক শিল্পী বঁটা গ্ৰহণ কৰি বৰষা ৰাণী বিষয়াই দেখুৱালে মহানুভৱতাৰ সুন্দৰ নিদৰ্শন । দৰাচলতে বৰষা ৰাণী বিষয়াই বঁটাৰ সৈতে লাভ কৰা ২৫,০০০ টকাৰ ১০,০০০ টকা প্ৰদান কৰিলে অন্য এজন শিল্পীক । নলবাৰী বাঁহজানীৰ পুতলা নাচৰ লোক শিল্পী গোবিন্দ তালুকদাৰক অভিনেত্ৰীগৰাকীয়ে প্ৰদান কৰিলে এই বঁটাৰ সৈতে লাভ কৰা ধনৰাশিৰ কিছু অংশ ।
সেয়েহে, ক’ব পাৰি যে অভিনেত্ৰীগৰাকীৰ এনে পদক্ষেপত এগৰাকী শিল্পীৰ আন এগৰাকী শিল্পীলৈ থকা মহানুভৱতা সুন্দৰকৈ প্ৰকাশ পাইছে । ইফালে যতীন বৰাৰ ছবি ৰাঘৱক লৈ সৰ্বত্ৰে চলি থকা বিতৰ্কৰ মাজতে ৰাঘৱৰ সন্দৰ্ভত অভিনেত্ৰীগৰাকীয়ে কয় যে, শাৰীৰিক অসুস্থতা তথা সময়ৰ বাবে বৰ্তমানলৈ ৰাঘৱ চোৱা নাই ।