মূল্যবৃদ্ধিৰ বিৰুদ্ধে নলবাৰীত AJYCP ৰ অভিনৱ প্ৰতিবাদ

ক'ভিডসৃষ্ট ভয়াৱহ পৰিস্থিতিৰ মাজতে অভাৱনীয় হাৰত বৃদ্ধি পাইছে অত্যাৱশ্যকীয় সামগ্ৰীৰ মূল্য ৷ যাৰ বাবে ৰাজ্যৰ সাধাৰণ জনতাৰ মাজত হাহাকাৰ অৱস্থাৰ সৃষ্টি হৈছে ৷ ইয়াৰ মাজতে অসম জাতীয়তাবাদী যুৱ ছাত্ৰ পৰিষদৰ নলবাৰী জিলা সমিতিয়ে সাব্যস্ত কৰিলে ব্যতিক্ৰমী প্ৰতিবাদ ৷

নলবাৰী,12 জুলাই: অত্যাৱশ্যকীয় সামগ্ৰীৰ মূল্যবৃদ্ধিৰ বিৰুদ্ধে নলবাৰীত অসম জাতীয়তাবাদী যুৱ ছাত্ৰ পৰিষদৰ উত্তাল প্ৰতিবাদ সাব্যস্ত ৷ সোমবাৰে দুপৰীয়া অসম জাতীয়তাবাদী যুৱ ছাত্ৰ পৰিষদৰ নলবাৰী জিলা সমিতিয়ে চহৰৰ মাজমজিয়াত এক প্ৰতীকি প্ৰতিবাদী কাৰ্যসূচী ৰূপায়ন কৰে ৷ বিজেপিৰ 100 প্লাছ ব্যৱস্থাক প্ৰতীকিৰে উপস্থাপন কৰি প্ৰতিবাদস্থলীত আখলত কেৰাহীত ব্যঞ্জন ৰান্ধি মূল্যবৃদ্ধিৰ প্ৰতিবাদ সাব্যস্ত কৰে প্ৰতিবাদকাৰীসকলে ৷ শীঘ্ৰে মূল্যবৃদ্ধি হ্ৰাস কৰাৰ দাবী প্ৰতিবাদকাৰীসকলৰ ৷

মূল্যবৃদ্ধিৰ বিৰুদ্ধে নলবাৰীত AJYCP ৰ অভিনৱ প্ৰতিবাদ

উল্লেখ্য যে, দেশজুৰি অব্যাহত থকা ক'ভিডসৃষ্ট ভয়াৱহ পৰিস্থিতিৰ মাজতে অভাৱনীয় হাৰত বৃদ্ধি পাইছে অত্যাৱশ্যকীয় সামগ্ৰীৰ মূল্য ৷ যাৰ বাবে দেশৰ লগতে ৰাজ্যৰ সাধাৰণ জনতাৰ মাজত হাহাকাৰ অৱস্থাৰ সৃষ্টি হৈছে ৷ লকডাউনৰ বাবে জীৱিকাৰ সকলো পথ হেৰুৱাই সাধাৰণ জনতা দিশহাৰা হোৱাৰ সময়তে অত্যাৱশ্যকীয় সামগ্ৰীৰ মূল্যবৃদ্ধিয়ে এক প্ৰকাৰে জুৰুলা কৰিছে সাধাৰণ জনতাক ৷ এমুঠি অন্নৰ বাবে এতিয়া হাহাকাৰ কৰিবলগীয়া হৈছে ৰাইজৰ লাখ লাখ দৰিদ্ৰ জনতাই ৷

পেট্ৰলৰ শতক আৰু মিঠাতেলৰ দ্বি-শতকলৈ হোৱা মূল্যবৃদ্ধিৰ লগতে অন্যান্য সামগ্ৰীৰো মূল্যবৃদ্ধিৰ বিৰুদ্ধে প্ৰতিবাদ সাব্যস্ত কৰি প্ৰতিবাদকাৰীসকলে প্ৰধানমন্ত্ৰী মোদী হায় হায়, অসম চৰকাৰ হায় হায়, মূল্যবৃদ্ধি ৰোধ কৰক আদি শ্ল'গানেৰে ৰাজপথ উত্তাল কৰি তোলে ৷ মনকৰিবলগীয়া যে, পৰিৱৰ্তনৰ শ্ল'গানেৰে শাসনলৈ অহা বিজেপি নেতৃত্বাধীন চৰকাৰখনৰ সময়ত শেহতীয়াকৈ ভয়াৱহভাৱে বৃদ্ধি পাইছে অত্যাৱশ্যকীয় সামগ্ৰীৰ মূল্য ৷

পেট্ৰ'লৰ দামে অভিলেখ সংখ্যক শতকৰ ঘৰ স্পৰ্শ কৰাত বিমোৰত পৰিছে সাধাৰণ ৰাইজ ৷ মূল্যবৃদ্ধিৰ বিৰুদ্ধে কংগ্ৰেছৰ লগতে বিভিন্ন দল-সংগঠনে সময়ে সময়ে প্ৰতিবাদ কৰি আহিছে যদিও সেই প্ৰতিবাদলৈ কাণসাৰ নাই চৰকাৰৰ ৷ কেৱল মাত্ৰ উন্নয়নৰ শ্ল'গানতেই যেন সীমাবদ্ধ হৈ পৰিছে বিজেপি নেতৃত্বাধীন কেন্দ্ৰীয় তথা ৰাজ্য চৰকাৰ ৷

লগতে পঢ়কঃবিধানসভাত উত্থাপিত হ’ল বিতৰ্কিত গো-সুৰক্ষা বিধেয়ক