নলবাৰী, ৩০ নৱেম্বৰ: ২০২১ৰ বিধানসভা নিৰ্বাচনক লৈ ৰাজ্যৰ ৰণকৌশল যুগুত কৰাত ব্যস্ত হৈ পৰিছে ৰাজনৈতিক দলসমূহ । নৱগঠিত দলসমূহেও শাসনৰ বাঘজৰী নিজৰ হাতলৈ আনিবলৈ প্ৰস্তুতি চলাইছে । দেওবাৰে নলবাৰীৰ ধৰ্মপুৰৰ চামতাত অনুষ্ঠিত হয় অসম জাতীয় পৰিষদৰ নলবাৰী জিলা জাতীয় যুৱ শক্তিৰ জিলা আহ্বায়ক সমিতি গঠনৰ প্ৰতিনিধি সভা । প্ৰতিনিধি সভাত উপস্থিত থাকি দলটোৰ কেন্দ্ৰীয় আহ্বায়ক চিত্তৰঞ্জন বসুমতাৰীয়ে কয় যে, 'জাতি ৰক্ষাৰ বাবে প্ৰয়োজন সাপেক্ষে জাতিদ্ৰোহী ভাই-ককাইৰ সতে যুঁজ দিবলৈ আমি সাজু । যুঁজি জয় হোৱাৰ বাবে আমি ওলাই আহিছো ৷'
ধৰ্মপুৰত নিৰ্বাচনী ৰণশিঙা বজাইছে অসম জাতীয় পৰিষদে চামতাৰ ৰূপকোঁৱৰ কলা পৰিষদ প্ৰাংগনত অনুষ্ঠিত সভাত উপস্থিত থাকে অসম জাতীয় পৰিষদৰ কেন্দ্ৰীয় মুখপাত্ৰ অভিজিৎ কমল ভূঞা, গুৱাহাটী বিশ্ববিদ্যালয়ৰ অধ্যাপক তথা ২০২১ চনৰ ধৰ্মপুৰ বিধানসভা সমষ্টিৰ জাতীয় পৰিষদৰ প্ৰাৰ্থী ড° শিখৰ কুমাৰ শৰ্মা, গুৱাহাটী বিশ্ববিদ্যালয়ৰ ভাষা সাহিত্য সংস্কৃতিৰ অৱসৰপ্ৰাপ্ত অধ্যাপক ড° উমেশ ডেকাকে প্ৰমুখ্যে কেইবাগৰাকীও কেন্দ্ৰীয় আহ্বায়ক ।
সভাত ড° শিখৰ কুমাৰ শৰ্মাই কয় যে, 'অসমৰ ভৌগোলিক, ৰাজনৈতিক ক্ষেত্ৰৰ প্ৰতিজন খিলঞ্জীয়া অসমীয়াৰ ভাষা, সংস্কৃতি, ধৰ্ম সুৰক্ষিত কৰি ৰখাৰ স্বাৰ্থত আমি অসম জাতীয় পৰিষদে বিজপি, কংগ্ৰেছ, এ আই উ ডি এফ আৰু অগপৰ বাহিৰে সকলো ৰাজনৈতিক দলৰ সৈতে আমি ঐকমত্যত উপনীত হৈ অসমৰ ৰাজনীতিত পৰিৱৰ্তনৰ সুচনা কৰাটো প্ৰায় খাটাং ৷' প্ৰতিনিধি সভাত শতাধিক যুৱ প্ৰতিনিধিয়ে অংশ লয়।
লগতে পঢ়ক:মহিলাসহ বেংক ডকাইতিত জড়িত তিনিজনক আটক
