ৰাজ মেধি ছাৰৰ দুখ আঁতৰিল, নিজ গৃহলৈ উভতিল ড৹ নন্দেশ্বৰ ৰাজ মেধি

অৱশেষত ঘৰলৈ ঘূৰি গ'ল সন্দিকৈ কলেজৰ প্ৰাক্তন অধ্যাপক ডo নন্দেশ্বৰ ৰাজমেধি ৷ পৰিয়ালৰ অত্যাচাৰৰ বাবে আত্মহত্যাৰ সিদ্ধান্ত লৈছিল নন্দেশ্বৰ ৰাজমেধিয়ে ৷ ২৫ মে'ৰ নিশা এক নিশ্চিত মৃত্যুৰ পৰা উদ্ধাৰ কৰি শান্তি নিবাস অনাথ আশ্ৰমত আশ্ৰয় দিছিল স্বত্বাধিকাৰী মজিবুৰ ৰহমানক ৷

নলবাৰী, 8 জুলাইঃ ৰাজ্যৰ এগৰাকী বিশিষ্ট শিক্ষাবিদ ড৹ নন্দেশ্বৰ ৰাজ মেধি । "ৰহস্যবাদ" আৰু "লোক সংস্কৃতিৰ" ওপৰত গবেষণা কৰি দুবাৰকৈ ডক্টৰেট ডিগ্ৰী লাভ কৰিছিল শিক্ষাবিদগৰাকীয়ে৷ ১৯৭৭ আৰু ২০০২ চনত ডক্টৰেট ডিগ্ৰী লোৱা বিশিষ্ট শিক্ষাবিদ গৰাকীয়ে এলাহাবাদ বিশ্ববিদ্যালয় আৰু মাদ্ৰাছ বিশ্ববিদ্যালয়ৰ পৰা দুবাৰকৈ এম এ ডিগ্ৰী লৈ গুৱাহাটী সন্দিকৈ কলেজত অধ্যাপনা কৰিছিল । গুৱাহাটীৰ সন্দিকৈ কলেজত সুদীৰ্ঘ ৩২ বছৰে অধ্যাপনা কৰিছিল ড৹ নন্দেশ্বৰ ৰাজ মেধিয়ে । ১৮ বছৰ পূৰ্বে অৰ্থাৎ ২০০২ চনত চাকৰি জীৱনৰ পৰা অৱসৰ গ্ৰহণ কৰাৰ পিছত অধ্যাপক গৰাকীয়ে বিভিন্ন সামাজিক কাম কাজত জড়িত হৈ পৰিছিল । পিচে এতিয়া অসুস্থ হৈ পৰাৰ লগে লগে তেওঁৰ ওপৰত চৰম নিৰ্যাতন আৰম্ভ হ'ল উচ্চ শিক্ষিত পুত্ৰ - কন্যাৰ । পিতৃয়ে জনোৱা মতে সৰু পুত্ৰক সুৰা সেৱনৰ বাবে ধন দিব নোৱাৰিলে যেতিয়াই তেতিয়াই মাৰপিট আৰম্ভ কৰি দিয়ে পিতৃ-মাতৃক । বিগত ১০ বছৰে পুত্ৰ - কন্যাৰ নিৰ্যাতন সহ্য কৰি অবশেষত দুই তিনিবাৰকৈ আত্মহত্যাৰ প্ৰচেষ্টা চলাইছিল অধ্যাপক গৰাকীয়ে । উল্লেখ্য যে, ২৫ মে'ৰ নিশা এক নিশ্চিত মৃত্যুৰ পৰা তেওঁক উদ্ধাৰ কৰিছিল শান্তি নিবাস অনাথ আশ্ৰমৰ স্বত্বাধিকাৰী তথা সাংবাদিক মজিবুৰ ৰহমানে। শিক্ষাবিদ গৰাকীক শান্তি নিৱাস বৃদ্ধাশ্ৰম তথা অনাথ আশ্ৰমত আশ্ৰয়ৰ ব্যৱস্থা কৰিছিল মজিবুৰ ৰহমানে । প্ৰায় দুমাহ ধৰি শান্তি নিবাসত থকাৰ অন্তত অৱশেষত অধ্যাপক গৰাকীক ঘৰলৈ নিবলৈ আহিল দুই পুত্ৰ সহ পত্নী ।

শান্তি নিবাস অনাথ আশ্ৰমত নলবাৰী জিলা সমাজ সেৱা সংঘৰ সম্পাদক আবেদ আলীৰ সঞ্চালনাত অনুষ্ঠিত এক গাম্ভীৰ্যপূৰ্ণ অনুষ্ঠানত অধ্যাপক গৰাকীক আনুষ্ঠানিক ভাৱে পৰিয়ালটোক চমজাই দিয়ে মজিবুৰ ৰহমানে৷ অনুষ্ঠানটোত নলবাৰীৰ সচেতন নাগৰিক জ্ঞানেন চক্ৰৱৰ্তীয়ে নিজ ভাষণত সাংবাদিক ৰহমানৰ কৰ্মৰাজিৰ শলাগ লৈ অধ্যাপক গৰাকীক নিবলৈ অহা দুই পুত্ৰ আৰু পত্নীক কৰযোৰে অনুৰোধ জনাই কয় - "আৰু অত্যাচাৰ নকৰিব ড৹ মেধি চাৰক ।" লগতে নলবাৰী জিলা লেখক সভাৰ সাধাৰণ সম্পাদক বিজয় বৰুৱাই তেনে ঘটনাৰ পুনৰাবৃত্তি নঘটাৰ কামনা কৰি সাংবাদিক মজিবুৰ ৰহমান আৰু শান্তি নিৱাস বৃদ্ধাশ্ৰম ও অনাথ আশ্ৰমক ধন্যবাদ জনাই ।

সবিশেষ জানিবলৈ পঢ়কঃ ঘৰলৈ নাযাও, বৃদ্ধাশ্ৰমতেই মই সুখীঃ ড৹ নন্দেশ্বৰ ৰাজ মেধি