নলবাৰী,১৭ জুলাই :নলবাৰী জিলাত শেহতীয়াকৈ বানে বিধ্বংসী ৰূপ ধাৰণ কৰিছিল (Floods affects Nalbari)। জিলাখনত সম্প্ৰতি বান পৰিস্থিতি উন্নত হৈছে যদিও এতিয়াও কোনো কোনো স্থানত ৰাইজে বিভিন্ন সমস্যাৰ সন্মুখীন হৈছে । বিশেষকৈ বানত পথ, দলং, কালভাৰ্ট আদি উটি যোৱাৰ ফলত যাতায়তৰ সমস্যাত পৰিছে জনসাধাৰণ । বৰভাগ ৰাজহ চক্ৰৰ অন্তৰ্গত পূৰ্ণদৈচপৰা গাওঁৰ মৰোৱা-কমলপুৰ সংযোগী পথৰ কালভাৰ্ট বৰলীয়া নদীৰ সোঁতত উটি যোৱাৰ ফলত এতিয়া নলবাৰী-কামৰূপ জিলাৰ যোগাযোগ ব্যাহত হৈ পৰিছে (Communication disrupted in Nalbari after flood)।
বৰ্তমান এখন বাঁহেৰে সাঁকো সাজি উলিয়াইছে স্থানীয় লোকসকলে । সাঁকোখনেৰে অতি বিপদসংকুলভাৱে ৰাইজে অহা যোৱা কৰিবলগীয়া হৈছে । কিন্তু সেই পথত এতিয়াও চাৰিচকীয়া বাহনৰ চলাচল বন্ধ হৈ আছে । যাৰ বাবে অঞ্চলটোৰ ৰাইজ বিভিন্ন ধৰণৰ সমস্যাৰ সন্মুখীন হৈছে ।
ৰাইজৰ এই দুৰ্দশা দেখি ওলাই আহিছে সদৌ অসম ছাত্ৰ সন্থা । অতি শীঘ্ৰে সেই স্থানত ৰাইজৰ যাতায়তৰ সুবিধা হোৱাকৈ ব্যৱস্থা গ্ৰহণৰ বাবে দাবী জনালে বাহাৰঘাট আঞ্চলিক ছাত্ৰ সন্থাই (AASU protest at Nalbari)। দেওবাৰে স্থানীয় ৰাইজৰ সহযোগত ছাত্ৰ সন্থাই এক বিক্ষোভ কাৰ্য্যসূচীও ৰূপায়ণ কৰে ।