চামগুৰি,11 এপ্ৰিল : গাঁৱৰ খাল, বিল, নৈত সততে পোৱা অনাদৃত পানী মেটেকাই এতিয়া আশাৰ সঞ্চাৰ কঢ়িয়াই আনিছে শ শ মহিলাৰ লগতে নিবনুৱা যুৱক যুৱতীসকলৰ বাবে । নগাঁও জিলাৰ ঐতিহ্যপূর্ণ আউনীআটী সত্ৰত কেইজনমান উদ্যমী পুৰুষ-মহিলাৰ প্ৰচেষ্টাত পানী মেটেকাৰ পৰা উৎপাদিত সামগ্ৰীয়ে গুৰুত্বপূর্ণ ভূমিকা গ্ৰহণ কৰিছে ৰাজ্যৰ লগতে দেশৰ বজাৰত ।
পানী মেটেকাৰ পৰা কঠ, বিভিন্ন ধৰণৰ মোনা, টুপী, ডাইনিং মেট, যোগা মেট আদিকে ধৰি বহু কেইবিধ প্ৰয়োজনীয় সামগ্ৰী উৎপাদন কৰি প্লাষ্টিক তথা প্ৰদূষণমুক্ত অসম গঢ়াৰ এক সুন্দৰ প্ৰয়াস কৰিছে এইসকল পুৰুষ-মহিলাই । ইতিমধ্যে উৎপাদিত সামগ্ৰীয়ে ৰাজ্যৰ লগতে বহিঃৰাজ্যতো ব্যাপক সমাদৰ লাভ কৰি বজাৰ দখল কৰিছে । বৃহত্তৰ ধিঙৰ চৌপাশে থকা বিভিন্ন খাল, বিল, নৈ, জান আদিৰ পৰা পৰ্যাপ্ত পৰিমাণে থকা পানী মেটেকা সংগ্ৰহ কৰি তেওঁলোকে এনেদৰে নিৰ্মাণ কৰিছে বহু ব্যৱহৃত সামগ্ৰী ।