নগাঁৱত পিষ্টলসহ গ্ৰেপ্তাৰ দুই অস্ত্ৰ সৰবৰাহকাৰী

নগাঁও আৰক্ষীয়ে বিশেষ সূত্ৰে লাভ কৰা তথ্যৰ ভিত্তিত ছয় জাঁই গুলীৰ লগতে এটা পিষ্টলসহ গ্ৰেপ্তাৰ কৰিবলৈ সক্ষম হয় দুগৰাকী অস্ত্ৰ সৰবৰাহকাৰী ৷ ৰূপহীহাটৰ কাঞ্চনপুৰৰ পৰা নগাঁও আৰক্ষীয়ে গ্ৰেপ্তাৰ কৰে মুক্তাৰ হুছেইন আৰু ছাইফুল ইছলাম নামৰ লোক দুজনক ৷

নগাঁও, 27 আগষ্টঃ নগাঁও আৰক্ষীৰ জালত দুই অস্ত্ৰ সৰবৰাহকাৰী ৷ মঙলবাৰে সন্ধিয়া ৰূপহীহাট কাঞ্চনপুৰৰ পৰা আৰক্ষীয়ে গ্ৰেপ্তাৰ কৰে দুগৰাকী অস্ত্ৰ সৰবৰাহকাৰী ৷ নগাঁও সদৰ আৰক্ষী আৰু বিশেষ শাখাৰ উপ-আৰক্ষী অধীক্ষকৰ নেতৃত্বত অভিযান চলাইছিল আৰক্ষীৰ দলে ৷ অভিযানৰ সময়তে ছয় জাঁই গুলীসহ এটা পিষ্টলৰ সৈতে আটক হয় অস্ত্ৰ সৰবৰাহকাৰী দুজন ৷ ধৃত অস্ত্ৰ সৰবৰাহকাৰী দুজন মুক্তাৰ হুছেইন আৰু ছাইফুল ইছলাম বুলি জনাইছে আৰক্ষীয়ে ৷ ইতিমধ্যে দুয়োজনকে জেৰা অব্যাহত ৰাখিছে আৰক্ষীয়ে ৷ আৰক্ষীয়ে প্ৰকাশ কৰা তথ্য অনুসৰি গ্ৰেপ্তাৰ হোৱা লোক দুজনৰ লগত আৰু এজন লোক আছিল যদিও তেওঁক কৰায়ত্ত কৰাত ব্যৰ্থ হয় ৷ আনহাতে ধৃত লোকদুজনৰ পৰা এখন দুচকীয়া বাহনো জব্দ কৰে আৰক্ষীয়ে ৷ আৰক্ষীয়ে প্ৰকাশ কৰা তথ্য অনুসৰি বাছ আৰু ৰেলেৰে নাগালেণ্ডৰ ডিমাপুৰৰ পৰা এইদৰে নগাঁৱলৈ অবৈধ অস্ত্ৰৰ সৰবৰাহ হৈ আহিছে ৷ ইয়াক প্ৰতিৰোধ কৰিবলৈ নগাঁও আৰক্ষীয়ে অভিযান অব্যাহত ৰাখিছে ৷