জখলাবন্ধা আৰক্ষীৰ জালত মাৰণাস্ত্ৰসহ তিনি চোৰাং চিকাৰী

জখলাবন্ধা আৰক্ষীয়ে মাৰণাস্ত্ৰসহ আটক কৰিছে তিনি চোৰাং চিকাৰীক ৷ ভাৰপ্ৰাপ্ত আৰক্ষী বিষয়া নিপু কলিতাৰ নেতৃত্বত জখলাবন্ধা আৰু বুঢ়াপাহাৰত অভিযান চলাই চোৰাং চিকাৰী তিনিটাক আটক কৰে আৰক্ষীৰ দলে ৷

কলিয়াবৰ,19 এপ্ৰিল : সোমবাৰে জখলাবন্ধা আৰক্ষীৰ জালত মাৰণাস্ত্ৰসহ আটক হৈছে তিনি চোৰাংচিকাৰী ৷ আটকাধীন চোৰাং চিকাৰী কেইটা নাগালেণ্ডৰ ডেনি ইয়প’থমি, ৰূপহীহাটৰ চাইদৰীয়াৰ আনোৱাৰ হুছেইন আৰু ৰূপহীহাটৰ 9 নং কাঠপাৰাৰ ৰফিকুল ইছলাম ।

জখলাবন্ধাত চোৰাং চিকাৰী আটক

জখলাবন্ধা আৰক্ষী থানাৰ ভাৰপ্ৰাপ্ত আৰক্ষী বিষয়া নিপু কলিতাৰ নেতৃত্বত জখলাবন্ধা আৰু বুঢ়াপাহাৰত আৰক্ষীৰ দলে অভিযান চলাই আটক কৰিবলৈ সক্ষম হয় তিনি চোৰাং চিকাৰীক । চাইলেঞ্চাৰসহ এটা থ্ৰী-নট-থ্ৰী ৰাইফল আৰু 10 ৰাউণ্ড থ্ৰী-নট-থ্ৰী ৰাইফলৰ গুলী জব্দ কৰে আৰক্ষীয়ে । লগতে জব্দ কৰে তিনিটা ম’বাইল ফোন ।

উল্লেখ্য যে, 2019 বৰ্ষতো আনোৱাৰ হুছেইন নামৰ চোৰাং চিকাৰীটোক গ্ৰেপ্তাৰ কৰিছিল আৰক্ষীয়ে । সম্প্ৰতি চোৰাং চিকাৰী তিনিটাক জখলাবন্ধা আৰক্ষী থানাত জেৰা অব্যাহত ৰাখিছে আৰক্ষীয়ে ।

লগতে পঢ়ক :শিলঘাট ৰে'ল ষ্টেচনত পুনৰ এজনৰ দেহত ক'ৰণা