নগাঁও, 21 অক্টোবৰ : লোকসভা নিৰ্বাচনলৈ এতিয়াও বাকী ছমাহতকৈ অধিক সময় । কিন্তু এতিয়াই প্ৰাক্তন মন্ত্ৰী ৰকিবুল হুছেইনৰ গৃহ সমষ্টি চামগুৰিত যেন আৰম্ভ হ'ল নিৰ্বাচনী হিংসা । ৰকিবুল হুছেইনৰ চামগুৰিত যেন সভা সমিতি অনুষ্ঠিত কৰিব নোৱাৰা এক পৰিবেশ আজিও বিৰাজমান । আজিও যেন কংগ্ৰেছী ৰাজত- বাধা, অপদস্থৰ সন্মুখীন হয় আন ৰাজনৈতিক দলৰ নেতা । শুকুৰবাৰে এনে এক পৰিস্থিতিৰেই সন্মুখীন হ'ল এ আই ইউ ডি এফৰ বিধায়ক আমিনুল ইছলাম । ৰকিবুল হুছেইনৰ সমষ্টি চামগুৰিত এ আই ইউ ডি এফ দলক যেন আৰম্ভণিৰ পৰাই সভা সমিতি অনুষ্ঠিত কৰিবলৈ দিয়া নাই একাংশ কংগ্ৰেছীয়ে ।
শুকুৰবাৰে সন্ধিয়া সমষ্টিটোৰ কাঠপাৰাত এ আই ইউ ডি এফ দলৰ এখন সভাত বিধায়ক আমিনুল ইছলামক বাধা প্ৰদান কৰাক কেন্দ্ৰ কৰি সৃষ্টি হ’ল উত্তপ্ত পৰিস্থিতিৰ । সমষ্টিটোত এখন ৰাজনৈতিক সভা অনুষ্ঠিত কৰিবলৈ যোৱা বিধায়ক আমিনুল ইছলামক বাধা প্ৰদান কৰাৰ অভিযোগ উত্থাপন হৈছে একাংশ কংগ্ৰেছীৰ বিৰুদ্ধে । আনকি বিধায়ক আমিনুল ইছলামক আক্ৰমণৰ চেষ্টা চলোৱাৰো অভিযোগ উত্থাপন হৈছে একাংশ কংগ্ৰেছীৰ বিৰুদ্ধে । ৰকিবুল হুছেইনৰ একাংশ সমৰ্থকে বিধায়ক আমিনুল ইছলামক ঘেৰাও কৰি সভা অনুষ্ঠিত কৰাত প্ৰদান কৰে বাধা । ইয়াৰ পিছতে সৃষ্টি হয় উত্তপ্ত পৰিস্থিতিৰ ।