কলিয়াবৰ, 15 জানুৱাৰীঃ ভোগালী বিহুৰ উৰুকাৰ নিশা কলিয়াবৰ আৰক্ষীয়ে এজন সন্দেহযুক্ত আলফা লিংকমেন গ্ৰেপ্তাৰ কৰে৷ আটকাধীন লোকজন কলিয়াবৰৰ বালিদুৱাৰ গাঁৱৰ নিতু বৰা বুলি জানিব পৰা গৈছে৷ সংযুক্ত মুক্তি বাহিনী অসম (স্বাধীন)ৰ লগত যোগাযোগ থকাৰ সন্দেহত নিজ বাসভৱনৰ পৰাই নিতুক গ্ৰেপ্তাৰ কৰে আৰক্ষীয়ে৷
উল্লেখ্য যে অভিযুক্ত নিতুয়ে আলফা স্বাধীনৰ কেডাৰৰ লগত ফেচবুক আৰু ফোনযোগে যোগাযোগ ৰক্ষা কৰাৰ উপযুক্ত প্ৰমান পাইছে বুলি কলিয়াবৰ মহকুমা আৰক্ষী বিষয়া মৃন্ময় দাসে প্ৰকাশ কৰিছে ৷ আৰক্ষীৰ সূত্ৰৰ মতে 'অভয় অসম'ৰ ওৰফে কৃষ্ণ গগৈৰ নামত থকা ফেচবুক একাউণ্টৰ লগত যোগাযোগৰ উপযুক্ত তথ্য প্ৰমান কলিয়াবৰ আৰক্ষীয়ে লাভ কৰিছে ৷ কেৰালাত কৰ্ম সূত্ৰে থকা নিতু যোৱা 25 দিন ধৰি কলিয়াবৰৰ নিজ গৃহতে আছিল ৷
লগতে পঢ়ক - ছয়গাঁৱৰ অক্ষয় বড়োৱে লাভ কৰিলে ৰূপৰ পদক