নিৰ্বাচনৰ নিৰাপত্তাথলীতে সতীৰ্থৰ গুলীত নিহত আৰক্ষী উপ পৰিদৰ্শক ভোলানাথ দাসৰ অন্ত্যেষ্টিক্ৰিয়া সম্পন্ন

সম্পূৰ্ণ সামৰিক মৰ্য্যদাৰে আৰক্ষী বিষয়া ভোলানাথ দাসৰ অন্ত্যেষ্টিক্ৰিয়া সম্পন্ন

বঢ়মপুৰ,৫ মে' : শোকাকুল পৰিৱেশত সামৰিক মৰ্য্যদাৰে অন্ত্যেষ্টিক্ৰিয়া সম্পন্ন সতীৰ্থৰ গুলীত নিহত হোৱা আৰক্ষী উপ পৰিদৰ্শক ভোলানাথ দাসৰ । লোকসভা নিৰ্বাচনত নিৰাপত্তাৰ দ্বায়িত্ব লৈ পশ্চিম বংগৰ হাওড়া জিলাত কৰ্তব্যত থকা অৱস্থাতে নিজ সতীৰ্থৰ গুলীত ধৰাসায়ী হয় সপ্তম আৰক্ষীৰ উপ পৰিদৰ্শক ভোলানাথ দাস । জানিব পৰা মতে, আৰক্ষী দুগৰাকীৰ মাজত কোনোধৰণৰ ব্যক্তিগত আক্ৰোশ নাছিল । হত্যাকাৰী লক্ষ্মীকান্ত বৰ্মন মানসিক বিকাৰগ্ৰস্ত আছিল আৰু অনিল ৰাজবংশী নামৰ জোৱান এজনক বচাবলৈ গৈ গুলীবিদ্ধ হয় আৰক্ষী বিষয়া ভোলানাথ দাস । এজন মানসিক বিকাৰগ্ৰস্ত লোকক নিৰ্বাচনী কামত কিয় নিয়োগ কৰা হৈছিল বুলি প্ৰশ্ন তোলাৰ লগতে হত্যাকাৰী জোৱানজনক গ্ৰেপ্তাৰ কৰাৰ লগতে হত্যাকাণ্ডটোৰ উচিত তদন্ত দাবী কৰিছে ভোলানাথ দাসৰ পৰিয়ালবৰ্গই ।

উল্লেখ্য যে , যোৱা ২ মে'ত অসম আৰক্ষীৰ সাত নম্বৰ বাহিনীৰ জোৱান লক্ষ্মীকান্ত বৰ্মনে নিজৰ ইনচাৰ্জ ৰাইফেলেৰে সতীৰ্থ জোৱান সকলক লক্ষ্য কৰি ধাৰাষাৰে গুলিয়াবলৈ ধৰে । মুঠ ১৮ জাঁই গুলী চালনা কৰাৰ ফলত অসম ৰাইফলছৰ উপ পৰিদৰ্শক ভোলানাথ দাস থিতাতে নিহত হোৱাৰ লগতে গুলীবিদ্ধ হৈ ৰণ্টুমনি মেধি আৰু অনিল ৰাজবংশী নামৰ জোৱান দ্বয় গুৰুতৰভাৱে আহত হৈ বৰ্তমানে চিকিৎসাধীন অৱস্থাত আছে । উক্ত ঘটনাই বাহিনীটোৰ মাজত তীব্ৰ চাঞ্চল্যৰ সৃষ্টি কৰি থকাৰ সময়তে আৰক্ষী বিষয়াজনৰ পৰিয়ালৰ এই অভিযোগে সৃষ্টি কৰিছে তীব্ৰ চাঞ্চল্যৰ ।ইফালে দেওবাৰে অন্ত্যেষ্টিক্ৰিয়া অনুষ্ঠানত নগাঁও জিলাৰ আৰক্ষী অধীক্ষক সত্যব্ৰত ৰায় মেধি উপস্থিত থাকি মৃতদেহত মাল্যৰ্পন কৰাৰ লগতে শোক সন্তপ্ত পৰিয়ালটোক সমবেদনা জ্ঞাপন কৰে ।