নগাঁও, 27 মে' :কোনোদিনেই লাখ টকাৰ সপোন দেখা নাছিল আদিল খানে । কিন্তু চিমেণ্টৰ বস্তাৰ পৰা ওলোৱা কাগজৰ সৰু এটা টুকুৰাই লাখপতি বনাই দিলে আদিল খানক। এক প্ৰকাৰ ভাগ্যই সলনি হৈ গ'ল আদিল খানৰ।
আপুনি হয়তো বুজিয়েই পোৱা নাই , এয়া আমি কি কৈছোঁ ? আপুনি হয়তো ভাবিছে কাগজৰ এটা সৰু টুকুৰাই কেনেকৈ বনাব পাৰে লাখপতি ? কৰ'ণা মহামাৰীয়ে সৃষ্টি কৰা পৰিবেশে সকলোকে আতংকিত কৰি তোলাৰ সমান্তৰালকৈ আৰ্থিকভাৱে জুৰুলা কৰিছে বহুজনক । এনে এক জটিল পৰিস্থিতিৰ মাজতেই এটা কাগজৰ টুকুৰাই ভাগ্যই সলাই দিলে আদিল খানৰ ৷
এটা সৰু কাগজৰ টুকুৰাৰ পৰা লাখপতি হ'ল আদিল খান নগাঁৱৰ ধিঙৰ জাৰমাৰীৰ নিবাসী আদিল খানে সৰু ঘৰ এটা নিৰ্মাণৰ পৰিকল্পনা কৰিছিল । সেইমতে কামো আৰম্ভ কৰিছে । ঘৰ নিৰ্মাণৰ বাবে প্ৰয়োজনীয় কিছু সা- সামগ্ৰী ক্ৰয় কৰে জাৰমাৰীৰ এখন দোকানৰ পৰা । দোকানখনৰ পৰা ক্ৰয় কৰা এটা চিমেণ্টৰ বস্তাৰ ভিতৰত থকা এই সৰু কাগজৰ টুকুৰাটোৱেই ভাগ্য সলাই দিলে আদিল খানৰ । অতি সাধাৰণ জীৱন যাপন কৰা দৰিদ্ৰ আদিল খানক একেবাৰে লাখপতি বনাই দিলে এটা কাগজৰ টুকুৰাই ।
আচলতে চিমেণ্টৰ বস্তাত থকা এই কাগজৰ টুকুৰাটো ভাগ্য সলোৱা এখন কুপনহে । এশ দুশ টকা নহয়, এক লাখ টকাৰ কুপন লাভ কৰিলে আদিল খানে । ইতিমধ্যে বিষয়টোৱে চৰ্চা লাভ কৰিছে সমগ্ৰ নগাঁৱত ৷ লাখ টকাৰ সপোন নেদেখা আদিল খান এতিয়া লাখপতি হ'ল । ঘৰ নিৰ্মাণৰ সপোনো আদিলৰ বাস্তৱ হ'ল ।
লগতে পঢ়ক: মৰিয়নীৰ বিধায়ক ৰূপজ্যোতি কুৰ্মীলৈ নগা দুৰ্বৃত্তৰ গুলী
