আকাশীযানত নিৰ্মাণ কৰা প্ৰতীকী চিহ্ন প্ৰদান মুখ্যমন্ত্ৰীক

টকিঅ' অলিম্পিকত ব্ৰঞ্জৰ পদক জয় কৰি সমগ্ৰ ভাৰতলৈ গৌৰৱ কঢ়িয়াই অনা অসম কন্যা লাভলীনা বৰগোঁহাই(LOVLINA BORGOHAIN)লৈ মৰমৰ উপহাৰ অসমৰ এগৰাকী মৃৎ শিল্পীৰ । বিমানেৰে যাত্ৰা কৰি থকা অৱস্থাতে বক্সিঙৰ প্ৰতীকী চিহ্ন নিৰ্মাণ কৰিছিল পাৰ্থপ্ৰতিম বৰুৱা নামৰ মৃৎ শিল্পীগৰাকীয়ে ।

চামগুৰি, ১২ আগষ্ট: লাভলীনা আহিছে । টকিঅ' অলিম্পিকত অসম তথা সমগ্ৰ ভাৰতৰে নাম জিলিকাই তোলা অসমৰ বক্সাৰ লাভলীনা বৰগোঁহাই(LOVLINA BORGOHAIN)ক আদৰিবলৈ সাজু হৈছে ৰাজ্যবাসী । নগাঁৱৰ পুৰণিগুদামৰ মৃৎ শিল্পী পাৰ্থপ্ৰতিম বৰুৱাই লাভলীনা বৰগোঁহাইৰ বাবে আগবঢ়াইছে এটি বিশেষ উপহাৰ । বিমানৰ ভিতৰতে মাটিৰে বক্সিঙৰ প্ৰতীকী চিহ্ন নিৰ্মাণ কৰিছে পাৰ্থপ্ৰতিম বৰুৱাই ।

এই প্ৰতীক চিহ্নটো নতুন দিল্লীত মুখ্যমন্ত্ৰী ড৹ হিমন্ত বিশ্ব শৰ্মাক অৰ্পণ কৰে মৃৎ শিল্পীগৰাকীয়ে । পাৰ্থপ্ৰতিম বৰুৱাই নিৰ্মাণ কৰা এই প্ৰতীকী চিহ্ন মুখ্যমন্ত্ৰী ড০ হিমন্ত বিশ্ব শৰ্মাই লাভলীনাক প্ৰদান কৰিব । উল্লেখ্য যে, টকিঅ' অলিম্পিকত অসম কন্যা লাভলীনা বৰগোঁহায়ে ব্ৰঞ্জৰ পদক জয় কৰি সমগ্ৰ দেশলৈ গৌৰৱ কঢ়িয়াই আনিছে । লাভলীনা হৈছে অলিম্পিকত ভাৰতৰ হৈ অংশগ্ৰহণ কৰা অসমৰ প্ৰথমগৰাকী মহিলা বক্সাৰ ।

বিমানৰ ভিতৰতে লাভলীনাৰ বাবে বিশেষ উপহাৰ প্ৰস্তুত কৰিলে মৃৎ শিল্পী পাৰ্থপ্ৰতিম বৰুৱাই

লাভলীনা স্বদেশলৈ উভতি অহাৰ পাচত শুভেচ্ছা জনাবলৈ মৃৎ শিল্পী পাৰ্থপ্ৰতিম বৰুৱাই গুৱাহাটীৰ পৰা দিল্লী অভিমুখে বিমান যাত্ৰা কৰি থকাৰ সময়তে অসমৰ কেঁচা মাটিৰে নিৰ্মাণ কৰে এই প্ৰতীকী চিহ্নটো ।

উল্লেখ্য যে, বৃহস্পতিবাৰে লাভলীনা অসমত আহি উপস্থিত হয় । গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত বক্সাৰগৰাকী উপস্থিত হোৱাৰ পাচতে মুখ্যমন্ত্ৰী ড৹ হিমন্ত বিশ্ব শৰ্মাই তেওঁ আদৰণি জনায় । ফুলাম গামোচা, ফুলৰ থোপাৰে মাতৃভূমিলৈ আদৰণি জনোৱা হয় বক্সাৰগৰাকীক । লাভলীনা বৰগোঁহায়ে আজি সন্ধিয়া ৰাজ্যপালকো সাক্ষাৎ কৰিব ।

লগতে পঢ়ক:গোলাঘাটত বক্সিং ষ্টেডিয়াম বিচাৰি ক্ৰীড়া মন্ত্ৰীলৈ চিঠি অজিত ভূঞাৰ