ৰূপহীহাটৰ ৰিং বান্ধৰ কামত ব্যাপক অনিয়মৰ অভিযোগ

ৰূপহীহাটৰ সুঁতিৰপাৰৰ প্ৰায়সমূহ ঠাইত বৰ্তমানেও উন্মুক্ত হৈ আছে মথাউৰি ৷ উপায়ন্তৰ হৈ ঠিকাদাৰৰ বিৰুদ্ধে ৰাইজে সাব্যস্ত কৰিছে উত্তাল প্ৰতিবাদ ৷ যোৱাটো বানত খহনীয়াই ভাঙি পেলোৱা চিতলমাৰি বিলৰ ৰিং বান্ধ বৰ্তমানেও প্ৰায় উন্মুক্ত হৈ থকাত আতংকিত হৈ পৰিছে নৈপৰীয়া ৰাইজ ৷

ৰূপহীহাট,15 জুন : বাৰিষা সমাগত ৷ কিন্তু বৰ্তমানেও সম্পূৰ্ণ হৈ নুঠিল এবছৰ পূৰ্বে খহনীয়াত জাহ যোৱা ৰূপহীহাটৰ চিতলমাৰি বিলৰ ৰিং বান্ধটো ৷ যাৰ বাবে এতিয়া আতংকৰ মাজেৰে দিন পাৰ কৰিছে নৈপৰীয়া ৰাইজে ৷ বাৰিষাৰ আগে আগে ৰিং বান্ধৰ কাম সম্পূৰ্ণ নকৰিলে পাঁচখনকৈ ৰাজহ গাঁও সম্পূৰ্ণৰূপে বানৰ কবলত পৰাটো প্ৰায় নিশ্চিত হৈ পৰা অঞ্চলৰ কেইটাৰ মাজত সৃষ্টি হৈছে হাহাকাৰ অৱস্থাৰ ৷

ৰাইজৰ অভিযোগ, ঠিকাদাৰে অতি লেহেমীয়া গতিৰে চিতলমাৰী ৰিং বান্ধৰ জিঅ' বেগৰ কাম আগবঢ়াইছে ৷ লগতে জুৰীয়া সুঁতিৰপাৰস্থিত চিতলমাৰী ৰিং বান্ধৰ জিঅ' বেগৰ কামসমূহত ব্যাপক অনিয়ম তথা দুৰ্নীতি সংঘটিত হোৱাৰ অভিযোগ উত্থাপন কৰিছে নৈপৰীয়া ৰাইজে ৷

চৰকাৰে আৱণ্টন দিয়া বহু লাখ টকাৰ ৰিং বান্ধটোৰ খহনীয়া ৰোধৰ বাবে কৰা জিঅ' বেগৰ কামসমূহত পূৰঠ বাঁহৰ পৰিৱৰ্তে কেৱল মাত্ৰ কুমলীয়া বাঁহহে ব্যৱহাৰ কৰা পৰিলক্ষিত হৈছে ৷ আনফালে কামসমূহৰ অতি লেহেমীয়া গতিৰ বাবে বৰ্তমানেও সম্পূৰ্ণ হৈ নুঠাত আতংকিত হৈ পৰিছে নৈপৰীয়া ৰাইজ ৷ ইফালে ধিং, শিলঘাট মথাউৰিটো পুনৰ নিৰ্মাণৰ নামত ঠিকাদাৰে বালি-মাটিৰে কাম কৰাৰ অভিযোগ স্থানীয় ৰাইজৰ ৷ ঘটনা সন্দৰ্ভত উচিত তদন্তৰ দাবী জনাই তথা মথাউৰি মেৰামতিৰ নামত চৰকাৰে আৱণ্টন দিয়া কোটি কোটি টকা কাৰ পকেটত সোমাল তাৰ তদন্ত কৰাৰ দাবীৰে প্ৰতিবাদ সাব্যস্ত কৰিছে নৈপৰীয়া ভুক্তভোগী ৰাইজে ৷

লগতে পঢ়কঃবিদ্যুৎ চুৰিৰ ক্ষেত্ৰত কঠোৰ হ'ব ৰাজ্য চৰকাৰ