কলিয়াবৰ,14 মাৰ্চ:কলিয়াবৰত দেওবাৰে সংঘটিত হয় এক শোকাৱহ পথ দুৰ্ঘটনা ৷ এই পথ দুৰ্ঘটনাত থিতাতে নিহত হয় এজন লোক । আন এজন গুৰুতৰভাৱে আহত হয় ৷ উলুৱনী আৰক্ষী নিৱেশৰ অন্তৰ্গত হালোৱা গাঁৱত বিয়লি প্ৰায় 5 বজাত এই শোকাৱহ দুৰ্ঘটনাটো সংঘটিত হয় ।
আৰক্ষী সূত্ৰৰ মতে, মিছাৰ কলিয়াপানীৰ পৰা এখন বলেৰ' পিক আপ ভানত দুজন লোকে মিছামুখ পামৰ নিজ ঘৰলৈ বাঁহৰ বেৰ কঢ়িয়াই আনিছিল । সেই সময়তে হঠাৎ প্ৰবল বতাহ বলিবলৈ লোৱাত দুৰ্ভাগ্যজনকভাৱে বাঁহৰ বেৰে দুয়োজনকে মহতিয়াই নিয়াৰ ফলত বাহনখনৰ তলত পৰি যায় । ফলত থিতাতে মিছামুখ পামৰ ভৰত থাপা (৪৭) নামৰ লোকজনৰ মৃত্যু হয় । লগতে গুৰুতৰভাৱে আহত হয় উত্তম কুমাৰ ছেত্ৰী (৩৫) নামৰ আন এজন লোক ।