কলিয়াবৰ,12 মে’:দেশত ভয়াৱহভাৱে বৃদ্ধি পাবলৈ ধৰিছে ক’ভিড-19 ৰ সংক্ৰমণ ৷ প্ৰতিদিনে আক্ৰান্তৰ সংখ্যা বৃদ্ধি পাবলৈ ধৰিছে ৷ তাৰ সমান্তৰলভাৱে ৰাজ্যতো উদ্বেগজনকভাৱে বৃদ্ধি পাবলৈ ধৰিছে ক’ভিড-19 ৰ সংক্ৰমণ ৷ নগাঁও জিলাৰ কলিয়াবৰতো বৃদ্ধি পাইছে ক’ভিড-19 ৰ সংক্ৰমণৰ সংখ্যা ৷
উল্লেখযোগ্য যে, কলিয়াবৰৰ এক আৱাসিক অঞ্চলত 11 গৰাকী লোকৰ দেহত ক’ভিড-19 ধৰা পৰাৰ পিছতে প্ৰশাসনে চুলুঙৰ এক অস্থায়ী আৱাসিক এলেকাক কণ্টেইনমেণ্ট জ'ন হিচাপে ঘোষণা কৰিছে ৷
জানিব পৰা মতে, নিৰ্মীয়মান দ্বিতীয়খন কলিয়াভোমোৰা দলং নিৰ্মাণ প্ৰতিষ্ঠান 'গেমন ইঞ্জিনীয়াৰ আৰু কনষ্ট্ৰাকচন'ৰ আৱাসিক এলেকাত ক’ভিড সংক্ৰমণ বৃদ্ধি পোৱাৰ লগে লগে মহকুমা প্ৰশাসনে কণ্টেইনমেণ্ট জ'ন ঘোষণা কৰিছে ৷ প্ৰায় এশজন আৱাসী থকা অঞ্চলটোত এই পৰ্যন্ত সম্পূৰ্ণ হোৱা নাই ক’ভিড-19 ৰ পৰীক্ষা ৷ বুধবাৰৰ দিনটোত ২৫ গৰাকী ব্যক্তিৰ দেহত ক’ভিড-19 ৰ পৰীক্ষা সম্পন্ন হয় যদিও অধিকাংশৰ ক’ভিড কীটৰ অভাৱত সম্পূৰ্ণ নহ'ল পৰীক্ষা । সম্প্ৰতি অঞ্চলটোত অধিক ক’ভিড-19 ৰোগী চিনাক্ত হোৱাৰ সম্ভাৱনা আছে ৷ উল্লেখ্য যে, বুধবাৰে কৰা পৰীক্ষাত গেমন ইণ্ডিয়াৰ ২ গৰাকী কৰ্মচাৰীৰ দেহত ক’ভিড-19 ৰ উপস্থিতি পোৱা গৈছে ।
