চামগুৰি, ৩০ আগষ্ট: ৰাজ্যৰ বিভিন্ন জিলাত বৰ্তমান বানে ভয়াৱহ ৰূপ ধাৰণ কৰিছে । নিতৌ ন ন অঞ্চল প্লাৱিত কৰিছে বাঢ়নি পানীয়ে । নগাঁও জিলাৰ চামগুৰিতো অনুৰূপ পৰিস্থিতিৰ সৃষ্টি হৈছে । এফালে, ক'ভিড-১৯ৰ ভয়াৱহতা, আনফালে কালৰূপ ধাৰণ কৰিছে ব্ৰহ্মপুত্ৰৰ বানে ।
সোমবাৰে সমষ্টিৰ ৰাইজৰ দুৰ্দশাৰ বুজ ল'বলৈ চামগুৰিৰ ভূৰবন্ধা পঞ্চায়তত উপস্থিত হয় চামগুৰি সমষ্টিৰ বিধায়ক ৰকিবুল হুছেইন । ৪নং ভগামুখৰ বানাক্ৰান্তৰ সমস্যাৰ বুজ লয় বিধায়কগৰাকীয়ে । লগতে তুলুঙা নাঁৱত উঠি ৪নং ভগামুখৰ বান বিধ্বস্ত অঞ্চল পৰিদৰ্শন কৰে । বানাক্ৰান্তক অত্যাৱশ্যকীয় সামগ্ৰী, মাস্ক যোগান ধৰাৰ লগতে তেওঁলোকৰ বাবে বিশেষভাৱে ক'ভিড প্ৰতিষেধকৰ ব্যাৱস্থা কৰিবলৈও আহ্বান জনায় । লগতে বন্য়াৰ্তৰ বাবে আশ্ৰয় শিবিৰৰ ব্যৱস্থা কৰিবলৈও তেওঁ অনুৰোধ জনায় ।
কিয়নো উক্ত অঞ্চলৰ ৰাইজৰ বাসগৃহৰ বাহিৰে-ভিতৰে এতিয়া পানী । বিদ্যালয়ো জলমগ্ন হৈ পৰিছে ।