চামগুৰি, 6 নৱেম্বৰ :তিনিচুকীয়াৰ ডুমডুমাৰ পৰা দিল্লীলৈ পদযাত্ৰা আৰম্ভ ৰাজেশ মহাননৰ ৷ প্ৰায় 10 দিন পূৰ্বে যাত্ৰা আৰম্ভ কৰি বৃহস্পতিবাৰে বিয়লি চামগুৰিত উপস্থিত হয় ৰাজেশ মহানন নামৰ ব্যক্তিগৰাকী ৷ দীৰ্ঘদিন ধৰি চাহ জনগোষ্ঠীৰ লোকসকলে ভোগ কৰি অহা বিভিন্ন সমস্যা সমাধানৰ পথ বিচাৰি দিল্লীলৈ যাত্ৰা আৰম্ভ কৰিছে ৰাজেশে ৷
দীৰ্ঘদিন ধৰি ৰাজ্যৰ চাহ জনগোষ্ঠীৰ লোকসকলে ভূগি আহিছে বহু সমস্যাত ৷ এই সমস্যাসমূহ সমাধান কৰাত ব্যৰ্থ হৈছে ৰাজ্যৰ লগতে কেন্দ্ৰীয় চৰকাৰ ৷ মাথো নিৰ্বাচনৰ পূৰ্বে চাহ অধ্যুষিত অঞ্চলসমূহলৈ আহি বিয়াগোম ৰাজনৈতিক নেতাসকলে দি যায় প্ৰতিশ্ৰুতি ৷ যাৰ বাবে এই সন্দৰ্ভত কেন্দ্ৰীয় চৰকাৰ তথা ভাৰতৰ প্ৰধানমন্ত্ৰী নৰেন্দ্ৰ মোডীক দৃষ্টিগোচৰ কৰিবলৈ ৰাজেশে গ্ৰহণ কৰিছে এই পদক্ষেপ ।
ৰাজেশে গৃহ জিলা তিনিচুকীয়াৰ ডুমডুমাৰ পৰা দিল্লীলৈ পদব্ৰজে গৈ প্ৰধানমন্ত্ৰীগৰাকীক সকলো কথা অৱগত কৰাৰ উদ্দেশ্যৰে আৰম্ভ কৰিছে এই যাত্ৰা । প্ৰায় তিনিমাহৰ অন্তত দিল্লীত উপস্থিত হ’ব ৰাজেশ মহানন ৷ নতুন দিল্লীস্থিত প্ৰধানমন্ত্ৰীৰ কাৰ্যালয়ত দেশৰ প্ৰধানমন্ত্ৰীগৰাকীক সাক্ষাৎ কৰি ৰাজেশে প্ৰদান কৰিব কেইবাদফীয়া দাবী সম্বলিত এখনি স্মাৰকপত্ৰ ।