নগাঁও,৭ জুলাই :বানপানীৰ পাছত এইবাৰ উৎকট গৰমে দহিছে ৰাজ্যবাসীক । প্ৰখৰ ৰ'দ আৰু গৰমৰ বাবে একপ্ৰকাৰ স্বাভাৱিক জীৱন যাত্ৰাও ব্যাহত হৈ পৰিছে । কিন্তু এনে এক পৰিস্থিতিৰ মাজতে বিদ্যুতৰ লুকা-ভাকুৱে সমস্যাত পেলাইছে ৰাজ্যবাসীক (Department of Power failed to provide regular power service)। বিশেষকৈ নগাঁও জিলাত বিদ্যুতৰ অনিয়মীয়া যোগানৰ বাবে ক্ষোভিত হৈ পৰিছে একাংশ লোক ।
লোড শ্বেডিঙৰ নামত অধিক সময় বিদ্যুৎ কৰ্তন কৰাৰ উপৰিও বিগত তিনি চাৰি দিনে নগাঁও চহৰৰে এটা এলেকাৰ বিদ্যুৎ সেৱা সম্পূৰ্ণৰূপে ব্যাহত হৈ আছে (Irregular supply of electricity in Nagaon)। যাৰ বাবে বুধবাৰে নিশা একাংশ ক্ষোভিত মহিলাই নগাঁৱৰ খৰমপট্টিস্থিত শক্তি বিভাগৰ কাৰ্যালয়ত উত্তপ্ত পৰিস্থিতিৰ সৃষ্টি কৰে (Protest against department of power in Nagaon)। বিদ্যুৎ বিভাগৰ কাৰ্যালয়ত দুপৰ নিশালৈকে বহু পুৰুষ-মহিলা উপস্থিত হৈ তীব্ৰ প্ৰতিবাদ সাব্যস্ত কৰে । উত্তাল কৰি তোলে নগাঁৱৰ ৩ নং বিদ্যুৎ উপ-সংমণ্ডলৰ কাৰ্যালয় ।
উল্লেখ্য যে, বিগত তিনি দিনে নগাঁও উত্তৰ হয়বৰগাঁও অঞ্চলত বিদ্যুৎ যোগান ব্যাহত হৈ থকাত নিশা উৎকট গৰমত থাকিব নোৱাৰি একাংশ মহিলাই খৰমপট্টিত থকা শক্তি বিভাগৰ উপ-সংমণ্ডলৰ কাৰ্যালয়ত উপস্থিত হৈ প্ৰতিবাদ সাব্যস্ত কৰে । ক্ষুব্ধ মহিলাসকলে কাৰ্যালয়টোত উপস্থিত হোৱাৰ সময়ত কোনো বিষয়া-কৰ্মচাৰী উপস্থিত নথকাৰ পিছতো ফেন চলি থকা প্ৰত্যক্ষ কৰি অধিক উত্তেজিত হৈ পৰে ।