বঢ়মপুৰ,10 ডিচেম্বৰ : ৰাজ্যৰ চৌদিশে ক্ৰমাৎ ভয়াৱহ ৰূপ ধাৰণ কৰিছে কেব বিৰোধী আন্দোলনে ৷ লোক সভাত ইতিমধ্যেই গৃহীত হৈছে নাগৰিকত্ব সংশোধনী বিধেয়ক,2019 ৷ ইয়াৰ পাচতেই আজি পুৱাৰে পৰা অধিক তীব্ৰতৰ হোৱা পৰিলক্ষিত হৈছে বিধেয়ক বিৰোধী আন্দোলন ৷ বিধেয়কখনৰ বিৰোধিতাৰে উত্তৰ-পূৰ্বাঞ্চলৰ ছাত্র সংগঠন নেছ'য়ে আহ্বান জনোৱা বন্ধৰ সৰ্বাত্মক প্ৰভাৱ পৰিছে ৰাজ্যৰ প্ৰায় আটাইকেইখন জিলাত ৷
কামপুৰৰ তেতেলিসৰাত খিলঞ্জীয়া ৰাইজৰ প্ৰতিবাদত উত্তাল ৰাজপথ নেছ'ৰ অসম বন্ধৰ আহ্বানৰ প্ৰতি সহাৰি জনাই আজি পুৱাই নগাঁওৰ কামপুৰৰ তেতেলিসৰাৰ খিলঞ্জীয়া ৰাইজে ৰাজপথত টায়াৰ জ্বলাই বিজেপি চৰকাৰৰ বিৰুদ্ধে সাব্যস্ত কৰে তীব্ৰ প্ৰতিবাদ ৷ প্ৰতিবাদকাৰী সকলে হাতে-হাতে ক'লা পতাকা লৈ বিভিন্ন শ্ল'গানেৰে ৰাজপথতে বহি ৰূপায়ন কৰে প্ৰতিবাদী কাৰ্যসূচী ৷ অসম চৰকাৰ হায় হায়, নৰেন্দ্ৰ মোডী গ' বেক ;সৰ্বানন্দ সোণোৱাল মুৰ্দাবাদ, হিমন্ত বিশ্ব মূৰ্দ্দাবাদ আদি বিভিন্ন শ্ল'গানেৰে প্ৰতিবাদকাৰী সকলে উত্তাল কৰি তোলে পৰিৱেশ ৷
