কলিয়াবৰত চৰকাৰী মাধ্যমৰ বিদ্যালয়ৰ ছাত্ৰ দৰিদ্ৰ শ্বাকিলৰ সফলতা - sakhil ahmed
সদ্যঘোষিত হাইস্কুল শিক্ষান্ত পৰীক্ষাত কলিয়াবৰৰ অতি দৰিদ্ৰ পৰিয়ালৰ সন্তান শ্বাকিল আহমেদৰ সফলতাত আনন্দিত হৈ পৰিছে অঞ্চলটোৰ ৰাইজ ।
কলিয়াবৰ ,৬ জুনঃ সুগন্ধি ফুল য'তেই নাথাক,তাৰ সুগন্ধি বিয়পিবই। অতি দৰিদ্ৰ পৰিৱেশতেই নিজ প্ৰতিভা আৰু একাগ্ৰতাৰ যোগেদি লাভ কৰা সফলতাই সুগন্ধি বিলাইছে কলিয়াবৰৰ জখলাবন্ধাৰ নাতি দুৰত্বৰ চাকণী বৰহোলাত। দৰিদ্ৰতাত ককবকাই থকা কলিয়াবৰৰ চিকণী-বৰহোলাৰ এইজন ছাত্ৰই আজি ঘোষিত হাইস্কুল শিক্ষান্ত পৰীক্ষাত উত্তীৰ্ণ হ'ল সুখ্যাতিৰে। নিজ মাটি-ভেটিহীন পিতৃ-মাতৃৰ সন্তান শ্বাকিল আহমেদ চৰকাৰী খণ্ডৰ চিকণী-বৰহোলা উচ্চ মাধ্যমিক বিদ্যালয়ত অধ্যয়ন কৰি আটাইকেইটা বিষয়তে লেটাৰ মাৰ্কসহ ৮৬.৩ শতাংশ নম্বৰেৰে ডিষ্টিংচন লাভ কৰি উত্তীৰ্ণ হ'বলৈ সক্ষম হয় । ইংৰাজীত -৮৪, অসমীয়াত-৯২,সাধাৰণ গণিতত-৮৮,সাধাৰণ বিজ্ঞানত-৮১,সমাজ বিজ্ঞানত-৮০ আৰু ঐচ্ছিক হিন্দী বিষয়ত-৮৬ নম্বৰৰে মুঠ ৫১৮ নম্বৰ লাভ কৰিছে। বৰ্তমান শিক্ষা ব্যৱস্থা আৰু আন বহু ছাত্ৰ-ছাত্ৰীৰ বাবে ৮৬.৩ % নম্বৰ গুৰুত্বহীন হ'লেও দৰিদ্ৰ পৰিয়ালটিৰ লগতে চুবুৰীয়াক আনন্দিত কৰিছে শ্বাকিলৰ এই সফলতাই। দৰিদ্ৰ ছাত্ৰজনে ভৱিষ্যতে ইয়াতকৈও অধিক সফল হৈ পিতৃ-মাতৃৰ লগতে গাঁওখনলৈ গৌৰৱ কঢ়িয়াই আনক।