নগাঁও,3আগষ্ট : শনিবাৰে শ্বেতা আগৰৱালা হত্যাকাণ্ডৰ ঐতিহাসিক ৰায় দিলে জিলা আৰু সত্ৰ ন্যায়াধীশ আদালতে ৷ মূল অভিযুক্ত গোবিন্দ সিংঘালক ফাঁচিৰ লগতে গোৱিন্দৰ মাতৃ আৰু ভগ্নীক যাৱজ্জীৱন কাৰাদণ্ডৰ ৰায় দিলে আদালতে ৷ আদালতৰ এই ৰায়ত তদন্তকাৰী বিষয়া তথা বৰ্তমানৰ নগাওঁ জিলা অতিৰিক্ত আৰক্ষী অধীক্ষক ৰ'জি কলিতাই আনন্দিত হৈ সংবাদ মাধ্যমৰ সন্মুখত প্ৰকাশ কৰিলে প্ৰতিক্ৰিয়া ৷
উল্লেখ্য যে, 2017 চনৰ 4 ডিচেম্বৰত প্ৰেমিক গোৱিন্দ সিংহালে মাতৃ কমলা দেৱী আৰু ভগ্নী ভৱানী সিংগালৰ সৈতে নিজ গৃহতে শ্বেতাক হত্যা কৰি জুই লগায় দিছিল ৷ আৰক্ষীয়ে অগ্নিদগ্ধ অৱস্থাত উদ্ধাৰ কৰিছিল শ্বেতাৰ মৃতদেহ ৷ এই ঘটনাৰ পাছতে ৰাজ্যত সৃষ্টি হৈছিল চাঞ্চল্যৰ ৷ প্ৰেমিক গোৱিন্দক ফাঁচীৰ দাবী জনাইছিল মেধাৱী ছাত্ৰীগৰাকীৰ পিতৃ-মাতৃৰ লগতে একাংশ জনসাধাৰণে ৷ ৰুজু হৈছিল গোচৰ,অব্যাহত আছিল তদন্ত ৷ মাত্ৰ দুই মাহ ১৩ দিনৰ ভিতৰতে আৰক্ষীয়ে গোচৰটোৰ অভিযোগনামা দাখিল কৰিবলৈ সক্ষম হৈছিল আৰু অভিযোগনামাৰ পৃষ্ঠাই-পৃষ্ঠাই আৰক্ষীয়ে সন্নিবিষ্ট কৰিছিল সংগ্ৰহ কৰা সকলো তথ্য ৷ হত্যাকাৰীৰ পক্ষই বহু তথ্য আৰু প্ৰমাণ নষ্ট কৰাৰ চেষ্টা কৰিছিল যদিও আৰক্ষীৰ তদন্তকাৰী দলৰ তৎপৰতাত ব্যৰ্থ হৈছিল সকলো ৷ অৱশেষত ২০১৭চনৰ ৪ডিচেম্বৰত সংঘটিত এই নৃশংস হত্যাকাণ্ডৰ ন্যায় পালে শ্বেতাৰ পৰিয়ালে ।