নগাঁৱৰ হয়বৰগাঁৱত ব্যাপক ভিৰ, তীব্ৰ যান জঁট

শেহতীয়াকৈ ৰাজ্যৰ ভিন্ন প্ৰান্তত সাপ্তাহিক লক ডাউন ঘোষণা কৰাৰ লগতে, সপ্তাহৰ সকলো দিনতে পথৰ এটা নিৰ্দিষ্ট দিশতহে ব্যৱসায়িক প্ৰতিষ্ঠান সমূহ খোলাৰ ক্ষেত্ৰত নিৰ্দেশনা প্ৰদান কৰিছিল প্ৰশাসনে ৷ কিন্তু এই নিৰ্দেশনা উলংঘন কৰাৰ দৃশ্য পৰিলক্ষিত হয় নগাঁৱৰ হয়বৰগাঁৱত ৷

নগাঁও, 7 আগষ্ট:কৰ'ণাৰ প্ৰাদুৰ্ভাৱ ৰোধ কৰিবলৈ চৰকাৰে শেহতীয়াকৈ ৰাজ্যৰ ভিন্ন প্ৰান্তত জাৰি কৰিছে সাপ্তাহিক লক ডাউন ৷ আনহাতে সপ্তাহৰ অন্য দিনসমূহত দোকান-পোহাৰ আদি খোলাৰ ক্ষেত্ৰতো প্ৰদান কৰিছে বিশেষ নিৰ্দেশনা ৷ বাৰ অনুযায়ী সপ্তাহৰ সকলো দিনতে পথৰ সোঁ অথবা বাওঁ নিৰ্দিষ্ট এটা দিশতহে ব্যৱসায়িক প্ৰতিষ্ঠান সমূহ খোলাৰ ক্ষেত্ৰত প্ৰশাসনে প্ৰদান কৰিছে নিৰ্দেশনা ৷

কিন্তু ইমানৰ পাচতো শুকুৰবাৰে নগাঁৱৰ হয়বৰগাঁৱত দেখিবলৈ পোৱা গ'ল ব্যাপক ভিৰৰ লগতে অত্যাধিক যান-জঁট ৷ পথৰ দুয়োকাষে দেখিবলৈ পোৱা গ'ল দোকান আৰু গাড়ীৰ পাৰ্কিং ৷ কৰ'ণা সৃষ্ট পৰিবেশৰ প্ৰতি লক্ষ্য ৰাখি প্ৰশাসনে সামাজিক দূৰত্ব মানি চলাৰ নিৰ্দেশনা জাৰি কৰিছে যদিও, নগাঁৱৰ হয়বৰগাঁও অঞ্চলত দেখিবলৈ পোৱা নগ'ল ইয়াৰ প্ৰভাৱ ৷ ইয়াৰ পৰিৱৰ্তে জধে-মধে খোলা দোকানসমূহক বাধা প্ৰদান কৰিবলৈ গৈ ব্যৱসায়ী সকলৰ হংকাৰৰ সন্মুখীন হ'ল স্থানীয় লোক ৷ বাৰম্বাৰ নগাঁও যান-বাহন আৰক্ষীৰ তৰফৰ পৰা এই নিৰ্দেশনাৰ বিষয়ে ঘোষণা কৰাৰ পাচতো নিয়ম উলংঘা কৰিছে একাংশ ব্যৱসায়ীৰ লগতে, স্থানীয় লোকে ৷ আনহাতে পদপথত ফলৰ ব্যৱসায় কৰা ব্যৱসায়ী সকলৰ সৈতে আৰক্ষীৰ যান-বাহন আৰক্ষীৰ বুজাবুজি থকা বুলিও অভিযোগ উত্থাপন কৰিছে একাংশ স্থানীয় লোকে ৷

লগতে পঢ়ক:গুৰুতৰ ৰোগীক পৰ্যাপ্ত চিকিৎসা প্ৰদানৰ দাবীৰে যোৰহাটত আছুৰ প্ৰতিবাদ