কলিয়াবৰ, 22 ডিচেম্বৰঃ কলিয়াবৰত বনৰীয়া গাহৰিৰ সন্ত্ৰাসৰ ফলত এনকেফেলইটিছ ৰোগৰ সংক্ৰমণৰ সন্দেহ কলিয়াবৰবাসীৰ ৷ দেওবাৰে এগৰাকী ১১ বছৰীয়া ছাত্ৰী জ্বৰত আক্ৰান্ত হৈ মৃত্যু ঘটাৰ ফলত এনকেফেলাইটিছৰ আশংকা কৰিছে অঞ্চলবাসীয়ে। কলিয়াবৰত মৌচুমী বৰা নামৰ ছাত্ৰী গৰাকী জ্বৰত আক্ৰান্ত হৈ কৰুণ মৃত্যুক সাৱতি লোৱাৰ পিছতে অঞ্চলজুৰি সৃষ্টি হৈছে তীব্ৰ আতংকৰ ।
উল্লেখ্য যে,কলিয়াবৰ শংকৰদেৱ শিশু নিকেতনৰ ষষ্ঠ শ্ৰেণীৰ ছাত্ৰী মৌচুমী বৰা প্ৰায় এসপ্তাহ ধৰি গুৱাহাটীত চিকিৎসাধীন হৈ আছিল। কিন্তু আধুনিক চিকিৎসা বিজ্ঞানৰ অগ্ৰগতিক ভেঙুচালি কৰি শনিবাৰে নিশা মৃত্যু হয় ছাত্ৰীগৰাকীৰ। কলিয়াবৰ তিনিআলিৰ দুলাল বৰাৰ কন্যা মৌচুমী বৰাৰ মৃতদেহ দেওবাৰে বাসগৃহলৈ অনাৰ পিছতে সৃষ্টি হয় এক শোকাকুল পৰিৱেশৰ। পৰিয়ালৰ তৰফৰ পৰা চিকিৎসকে মেমিনগ'-এনকেফেলাইটিছত আক্ৰান্ত হৈ ছাত্ৰীগৰাকীৰ মৃত্যু হৈছে বুলি জানিবলৈ দিয়ে।