মুক্তিযোদ্ধাৰ পৰিয়াল বিদেশী!

নগাঁৱত মুক্তিযোদ্ধাৰ পৰিয়াললৈ আহিল এন আৰ চিৰ জাননী । প্ৰয়াত মুক্তিযোদ্ধা মৃত্যুঞ্জয়ৰ নায়ক মহাদানন্দ দেৱ গোস্বামীৰ জীয়ৰীলৈ আহিল এন আৰ চিৰ জাননী । ঘটনাৰ ফলত সমগ্ৰ অঞ্চলজুৰি প্ৰতিক্ৰিয়াৰ সৃষ্টি ।

মৰিগাঁও,১৪ মে' : এইবাৰ মুক্তিযোদ্ধাৰ পৰিয়াললৈ আহিছে এন আৰ চি ৰ জাননী । এই ঘটনাই সমগ্ৰ অঞ্চলতে সৃষ্টি কৰিছে তীব্ৰ প্ৰতিক্ৰিয়াৰ । প্ৰয়াত মুক্তিযোদ্ধা মৃত্যুঞ্জয়ৰ নায়ক মহাদানন্দ দেৱ গোস্বামীৰ পৰিয়ালৰ জীয়ৰী বুলোমাই গোস্বামীলৈ আহে এন আৰ চিৰ জাননী । উল্লেখ্য যে,মৰিগাঁও জিলাৰ মায়ং প্ৰাথমিক শিক্ষা খণ্ডৰ অন্তৰ্গত বিলিমৰা প্ৰাথমিক বিদ্যালয়ৰ প্ৰধান শিক্ষয়ত্ৰী বুলুমাই গোস্বামী । যোৱা ৯ মে' দিনা জাননী যোগে ১৬ মে' তাৰিখে নগাঁও উপায়ুক্ত কাৰ্যালয়ত বুলুমাই আৰু তেঁওৰ চাৰিগৰাকীক ভগ্নীক হাজিৰ হ'বৰ বাবে নিৰ্দেশ প্ৰদান কৰে এন আৰ চি কৰ্তৃপক্ষই । জানিব পৰা মতে, বিকাশ জ্যোতি বৰদলৈ নামৰ এজন ব্যক্তিৰ নেতৃত্বত উত্থাপিত হৈছে এই অভিযোগনামা । সম্প্ৰতি এই কাণ্ডকলৈ মানসিকভাৱে ভাগি পৰিছে মুক্তিযোদ্ধা গৰাকীৰ কন্যা কেইগৰাকী । লগতে এই সন্দৰ্ভত অভিযোগকাৰীৰ ওপৰত মানহানি গোচৰ তৰিব বুলি জনাইছে বুলুমাই গোস্বামীয়ে ।

ইফালে বিকাশ বৰদলৈ নামৰ এই লোকজনেই অনুসূচীত জাতি উন্নয়ন নিগমৰ উপাধ্যক্ষ মৰিগাঁও জিলা পৰিষদৰ প্ৰাক্তন সদস্য স্বপন মণ্ডলৰ পৰিয়ালৰ বিৰুদ্ধেও আপত্তি দাখিল কৰিছে । প্ৰকৃত খিলঞ্জীয়া লোকসকলক কি ভাবি এনেদৰে জাননী প্ৰেৰণ কৰিছে সেয়া এতিয়া ৰহস্যময় হৈ আছে সাধাৰণ ৰাইজৰ বাবে । অৱশ্যে ঠিকনাবিহীন ভুৱা আপত্তিকাৰীৰ বিৰুদ্ধে প্ৰশাসনে কি ব্যৱস্থা গ্ৰহণ কৰে সেইয়া অনাগত দিনত লক্ষণীয় হ'ব ।